அறிந்து, உள நாள் கைம்மாறு அளித்திடச் செல்வார் போல - செல்வம்
உள்ள நாளில் கைம்மாறாகத் திருப்பி அளிக்கச் செல்கின்றவரைப்போல,
வயல் வளம் சுரக்க மேனாள் மழை வளஞ் சுரந்த - வயல்களில் விளையும்
வளம் சுரக்கும்படி முன்னாளில் மழை வளம் சுரந்து பெய்து கொடுத்த, சீர்
சால் புயல் வளர் விசும்பில் - சிறப்பு மிகுந்த மேகங்கள் வளர்கின்ற
வானத்தில், செந்நெல் போய்ப் புக வளர்ந்த - செந்நெற் பயிரானது போய்ப்
புகும்படி வளர்ந்தன.

     மேகம் மழை கொடுத்ததனால் நெற்பயிர் தன் வளத்தைத் திருப்பிக்
கொடுக்க வானத்தைச் சென்று அடைந்தது என்பது கருத்து. புலவோர்
என்பது பொதுவாக அறிஞர் என்ற பொருளில் வந்தது. இது
உயர்வுநவிற்சியணி.
                                                     (9)

 

916.	இத்தகை யாய நன்னாட் டெல்லைகண் டொல்லை யேகி மைத்தழை கபாட வாயின் மணிநிழல் வந்து நண்ணிக் கொத்தலர் குழலி யோடும் கோளொடும் குமர னோடும் மெய்த்திற லமைச்ச ரொடும் வித்தகன் காசி புக்கான்.

       (இ - ள்.) இத்தகையாய நன்னாட்டு எல்லை கண்டு ஒல்லை
ஏகி - இத்தகைய நல்ல நாட்டின் வளமெல்லாம் கண்டு விரைவாகச்
சென்று, மை தழை கபாட வாயில் மணி நிழல் வந்து நண்ணி - மேகங்கள்
வந்து படிகின்ற கதவுகளையுடைய கோட்டைவாயிலின் அழகிய நிழலிலே
தங்கி, கொத்து அலர் குழலியோடும் கோளொடும் குமரனோடும் -
கொத்தாகிய மலர்களையணிந்த கூந்தலையுடைய மனைவியோடும்
சுக்கிரனோடும் மைந்தனாகிய தேவதாசனுடனும், மெய்த்திறல்
அமைச்சனோடும் - உண்மைத்தன்மையுடைய அமைச்சனுடனும், வித்தகன்
காசி புக்கான் - வல்லமையுடைய மன்னன் காசிமாநகரத்தினுள் புகுந்தான்.

     இவ்வாறு வளம் பொருந்திய காசிநாட்டெல்லையைக் கண்டு
அரிச்சந்திரன் தன் மனைவி மைந்தனோடும் அமைச்சனோடும்
சுக்கிரனோடுங் கூடிக் காசிக்குட்புகுந்தான் என்பது.
                                                    (10)

 

	காசி நகர் காண்டல்
917.	ஆரண சாலை கோடி ஆவண வீதி கோடி தோரண வாயில் கோடி சுடர்மணி மாடம் கோடி பூரண கும்ப மின்னிப் பொலியுமண் டபங்கள் கோடி வாரண பந்தி கோடி வயப்பரி பந்தி கோடி.

     (இ - ள்.) ஆரண சாலை கோடி - மறை ஓதுவார் வாழும்
இடங்கள் பலகோடி, ஆவண வீதி கோடி - கடைத்தெருவுகள் பல கோடி,
தோரண வாயில் கோடி - தோரணங்கள் கட்டிய வீட்டு வாயில் பல
கோடி, சுடர் மணி மாடம் கோடி - ஒளிவீசும் மணிகள் பதித்த
மாடமாளிகைகள் பல கோடி, பூரண கும்பம் மின்னிப் பொலியும்
மண்டபங்கள் கோடி - நிறைகுடங்கள்