வைத்து அழகுபெற விளங்குகின்ற மண்டபங்கள் பல கோடி, வாரண
பந்தி கோடி - யானை கட்டும் இடங்கள் பல கோடி, வயப் பரி பந்தி
கோடி - வெற்றியையுடைய குதிரை வரிசைகள் பல கோடி உள்ளன.

     உள்ளன என்னுஞ் சொல் வருவித்து முடிக்கப்பட்டது,
பயனிலையின்றி இக்கவிநிற்றலால், அக் காசிமாநகரத்தில் எண்ணிறந்த
ஆரண சாலை முதலியவை இருந்தன என்பது. கோடி என்பது எண்ணைக்
குறித்ததன்று; எண்ணிறந்ததைக் காட்டவந்த சொல் எனக் கொள்க.
                                                    (11)

 

918.	ஆடு மங்கைய ரனந்த ராடுவா ராடல் காண ஓடுமங் கைய ரனந்த ருலவுமங் கைய ரனந்தர் பாடுமங் கைய ரனந்தர் பயிறரு வீதி எல்லாம் வாடுமங் கையும் அயோத்த மன்னனும் கண்டு போனார்.

       (இ - ள்.) ஆடும் மங்கையர் அனந்தர் ஆடுவார் - நடனம்
ஆடும் பெண்கள் மிகப் பலர் ஆடுவார்கள், ஆடல் காண ஓடும்
மங்கையர் அனந்தர் - நடனத்தைக் காண ஓடும் மங்கையர் பலர்,
உலவும்மங்கையர் அனந்தர் - வீதிகளிலே போக்கு வரவுடைய பெண்கள்
அளவில்லாதவர், பாடும் மங்கையர் அனந்தர் - இசை பாடும் மங்கையர்
மிகப் பலர், பயில் தரும் வீதி யெல்லாம் - பழகி உலாவுகின்ற வீதிகளை
யெல்லாம், வாடும் மங்கையும் அயோத்தி மன்னனும் கண்டு போனார் -
வாடி வருந்துகின்ற சந்திரமதி என்னும் மங்கையும் அயோத்தி மன்னனாகிய
அரிச்சந்திரனும் கண்டு சென்றார்கள்.

     அந்நகர மங்கையரிற் சிலர் ஆடுவாரும், அவ்வாடலைக் காண ஓடு
வாரும் உலவுவாரும் பாடுவாரும் ஆக மறுகிற் பயின்றனர். அவரைக்
கண்டு சென்றனர் என்க.
                                                    (12)

 

919.	தொலைவிலா முதல்வ னார்க்குஞ் சுக்கிரன் றனக்கு மாய வலைவின்மா நகரி புக்கா ரரிவைய ரளகக் காடும் கலைவிழிக் கடலும் இன்பக் கடிதட வரவும் பார முலைஎனும் மலையும் வந்து முடுகின மறுகு தோறும்.

     (இ - ள்.) தொலைவு இலா முதல்வனார்க்கும் சுக்கிரன் தனக்கும்
- அழிதல் இல்லாத புகழுடைய அரிச்சந்திரனுக்கும் வெள்ளி என்னும்
சுக்கிரனுக்கும், மாய அலைவின் மா நகரி புக்கார் - மாயத்தன்மையோடு
கூடிய அலைச்சலைத் தருகின்ற பெரிய நகரத்திற் புகுந்தனர், அரிவையர்
அளகக் காடும் - அப்பொழுது பெண்களின் கூந்தல் என்னும் காடும்,
கலை விழிக் கடலும் - கலைமான் போன்ற கண்கள் என்னும் கடலும்,
இன்பக் கடிதட அரவும் - இன்பத்தைத் தருகின்ற அல்குல் என்னும்
பாம்பும், பார முலை எனும் மலையும் வந்து முடுகின மறுகு தோறும் -
சுமையான முலை என்னும் மலையும் வந்து அவர்களை நெருக்கி விரைவு
படுத்தின வீதிகளில் எல்லாம்.

     கடல், காடு, மலை முதலியன வந்து அரிச்சந்திரனையும்
வெள்ளியையும் தடைபடுத்தின என்பது கருத்து. மன்னனைக் கூறவே,
சந்திரமதி முதலானவரும் அடங்கினர்.