அம்பலஞ்சேர்ந்து அடிசில் சமைத்துண்ணல்
922.	அப்பெரும் பொதியில் புக்கா ரமைச்சனங் காடி நண்ணி எப்பெரும் பண்ட மும்கொண் டெய்தின னிமைப்பி னட்டுச் செப்பரும் திருவி னல்லா டிருக்கையாற் படைத்த அன்னம் துய்ப்பன செய்தி ருந்தா ரிருந்தபி னிகழ்ந்த சொல்வாம்.

     (இ - ள்.) அப் பெரும் பொதியில் புக்கார் அமைச்சன் அங்காடி
நண்ணி - அந்தப் பெரிய அம்பலத்தினுள் எல்லாரும் புகுந்தார். புகுந்த
பின் அமைச்சன் கடைத்தெருவிற்குச் சென்று, எப் பெரும் பண்டமும்
கொண்டு எய்தினன் - எல்லாவகையான பொருள்களும் வாங்கிக்
கொண்டுவந்து சேர்ந்தான், செப்ப அரும் திருவின் நல்லாள் இமைப்பின்
அட்டு - சொல்லுதற்கரிய சிறப்பினையுடைய திருமகளைப் போன்ற
சந்திரமதி இமைப்பொழுதில் சமைத்து, திருக்கையால் படைத்த அன்னம்
- அவள் அழகிய கையினால் இட்ட சோறு கறிகளை, துய்ப்பன
செய்திருந்தார் - அரசன் முதலானோர் உண்டு மகிழ்ந்திருந்தனர்,
இருந்தபின் நிகழ்ந்த சொல்வாம் - அவ்வாறு இருந்தபின் நடந்தவற்றைச்
சொல்லுவோம்.

     பொது + இல் = பொதியில் என்பது, பொதுவான இடம்; அறச்
சாலை. மன்னன் மனைவியும் அடுதல் தொழில் வல்லவளாயிருந்தாள்
என்பது இங்குக் குறிப்பாகத் தோன்றியது. 'இமைப்பின் அட்டு'
தொழில்வல்லமையயை யுணர்த்திற்று. சொல்வாம் என்பது நூலாசிரியர்
கூற்று. நாம் என்பது வருவிக்க.
                                                    (16)

 

	சுக்கிரன் கடனைக் கொடுக்குமாறு கூறித் தடுத்தல்            சந்தக் கலி விருத்தம்
923.	ஒருநாள் செல மறுநாளையி லுறுதீவினை நினையாப் பொருமால்களி றுடையானொடு புகரோன்மிக வெகுளா முருகார்தொடை முடியாய்மறை முனிகூறிய பொருணீ தருமாறுள தெனிலின்றது தருகென்றுத டுத்தான்.

       (இ - ள்.) ஒரு நாள் செல மறு நாளையில் உறு தீவினை
நினையா - ஒரு நாள் சென்றவுடன் மறுநாளில் செய்யவேண்டிய
தீவினைகளை நினைத்து, பொரு மால் களிறு உடையானொடு புகரோன்
மிக வெகுளா - போர் செய்யும் பெரிய யானையையுடைய
அரிச்சந்திரனோடு வெள்ளி என்பவன் மிகவும் கோபித்து, முருகு ஆர்
தொடை முடியாய் - மணம் வீசும் மாலை அணிந்த முடியையுடைய
மன்னனே !, மறை முனி கூறிய பொருள் நீ தருமாறு உளதெனில் -
மறைகளைக் கற்ற முனிவன் கூறிய பொருளை நீ தருமாறு உளதென்றால்,
இன்று அது தருக என்று தடுத்தான் - இன்று அதனைத் தருவாயாக என்று
தடுத்தான்.

     'விசுவாமித்திரருக்கு நீ 'தருவேன்' என்று கூறிய பொருளை இன்றே
தரவேண்டும்; தந்துதான் பின் எங்குஞ் செல்லவேண்டும்' என்று சினந்து
கூறித் தடுத்தான் வெள்ளி.
                                                    (17)