(இ - ள்.) தவருக்கு அலது - தவமுனிவருக்கு அல்லாமல்,
அயிராவதம் எனும் நீள் கர சைலத்தவருக்கு அலது - அயிராவதம்
என்னும் நீண்ட கைம்மலையாகிய யானையையுடைய இந்திரனுக்கு
அல்லது, அளகாபுரிக்கு அரசுக்கு அலது - அளகாபுரி என்னும்
பட்டணத்தை ஆளும் குபேரனுக்கு அல்லது, அலை சேர் உவரிக் கடல்
புடை சூழ் - அலைகளையுடைய உவர்க்கடலால் சூழப்பெற்ற, வியன்
உலகத்திடை உறுவார் - பரந்த இவ்வுலகத்தில் தங்கியிருப்பவர், எவருக்கு
எளிது இவருக்கு உறு விலை நல்குவது என்பார் - இவருக்குரிய விலை
கொடுப்பதற்கு எவருக்கு எளிதாகும் என்று கூறுவார்.

     சிலர் இவர்களை மனிதர்களில் எவர் வாங்கமுடியும்? முனிவர்,
இந்திரன், குபேரன் இவர்களில் ஒருவர் வந்து வாங்கினால் வாங்கலாம்
என்றும் பேசினர் என்பது.
                                                    (28)

 

	மறையோனொருவன் தெருவில் வருதல்
935.	மண்மின்னென வருமென்மனை வியையும்மக னையும்நீர் கொண்மின்னென விலைகூறிய கோமானுரை கேளா விண்மின்னென வலையும்புரி வெண்ணூலணி மார்பன் கண்முன்னொரு மறையோனதி களவோடெதிர் வந்தான்.

       (இ - ள்.) மண் மின் என வரும் என் மனைவியையும் - பூமகள்
போல வருகின்ற என் மனைவியையும், மகனையும் - என் மைந்தனையும்,
நீர் கொண்மின் என விலை கூறிய கோமான் உரை கேளா - நீர்
விலைக்குப் பெற்றுக்கொள்வீராக என்று விலை கூறிக்கொண்டு வந்த
மன்னன் உரையைக் கேட்டு, விண் மின் என அலையும் புரி வெண் நூல்
அணி மார்பன் - விண்ணிற்றோன்றும் மின்னலைப்போல அசைகின்ற
முறுக்கப்பட்ட வெண்மையான பூணூலை அணிந்த மார்பினை யுடையவன்,
ஒரு மறையோன் கண் முன் அதி களவோடு எதிர் வந்தான் - ஒரு
மறையவன் கண்ணுக்கு முன்னால் மிகுந்த களவு எண்ணத்தோடு எதிரிலே
வந்தான்.

     மண்மின் என்பது மண்ணாகிய பெண் என்ற பொருளைத் தந்தது.
பூமிதேவி என்பது, பூமகள் என்றது பூமிதேவியைக் குறித்ததாகக் கொள்க.
மண்ணிற்றோன்றிய மின்னலைப்போல எனவும் பொருள் கொள்ளலாம்.
கேளா - கேட்டு : செய்யா என்ற வாய்பாட்டு வினையெச்சம். களவோடு
என்றது, மெய்யான மறையவனல்லன்; வஞ்சக வேடத்துடன் வந்த
மறையவன் என்பதை யுணர்த்தியது. தீக்கடவுள் தான் மறையவனாக
வந்தான் எனத் தெரிகிறது.
                                                    (29)

 

	மறையோனும் மன்னனும் உரையாடல்
936.	என்சொல்லினை முன்சொன்னவை இன்னம்பக ரெனவே மென்சொல்லியை இளமைந்தனை விலைகூறின னெனவே மன்சொல்லலு நின்சேயையும் மடமானையும் விற்கும் பொன்சொல்லென விறல்வேலினன் மறையோனொடு புகல்வான்.