யுடைய பெண், நெற் குத்தும் கொடுமை காணா - நெல்லைக் குத்துகின்ற
கொடுமையைக் கண்டு, மையினிற் திகழ் வேற் கண்ணார் - மை
பூசப்பெற்று விளங்குகின்ற வேல் போன்ற கண்களையுடைய, அரம்பையர்
மறுகிச் சோர்ந்தார் - தேவப்பெண்கள் வருந்திச் சோர்ந்தார்கள்.

     சந்திரமதி நெற்குற்றும் கொடுமை கண்டு அரம்பையரும் மனம்
கலங்கி வருந்தினர் என்பது. கண்ணார், அரம்பையர் என இரண்டாக்கி
மண்ணுலக மாதரும் விண்ணுலக மாதரும் கண்டு வருந்தினர் எனவும்
கொள்ளலாம்; காசிநகர்ப் பெண்கள் கண்டவரும் வருந்துவது
இயற்கையாதலின்.
                                                     (2)

 

979.	புன்கணுற் றரம்பை மாதர் வருந்தவும் புந்தி செய்யா வன்கண னிரக்க மில்லான் மடித்தவாய் வெடித்த சொல்லான் றன்கணன் பில்லான் பொல்லான் றறுகணன் விலைகொண்                                         டாள்வோன் இன்கணில் லாதாள் பாரி யிவனிலும் கொடிய பாவி.

       (இ - ள்.) புன்கண் உற்று அரம்பை மாதர் வருந்தவும் - துன்பம்
உற்று அரம்பைப் பெண்கள் வருந்தவும், விலை கொண்டு ஆள்வோன் -
விலை கொடுத்து வாங்கி ஆளுகின்ற மறையவன், புந்தி செய்யா வன்கணன்
- சந்திரமதி படும் துன்பத்தை நினையாத கொடுமையுடையவன், இரக்கம்
இல்லான் - இரக்கம் சிறிதும் இல்லாதவன், மடித்த வாய் வெடித்த
சொல்லான் - மடித்த வாயினையும் வெடித்த சொல்லையும் உடையவன்,
தன்கண் அன்பு இல்லான் - தன்னிடத்தில் சிறிதும் அன்பு இல்லாதவன்,
பொல்லான் - பொல்லாத தன்மையுடையவன், தறுகணன் - அஞ்சாதவன்,
பாரி இவனிலும் கொடிய பாவி - அவன் மனைவி அவனைக் காட்டிலும்
கொடிய பாவி ஆவாள், இன்கண் இல்லாதாள் - இரக்கத்தன்மை சிறிதும்
இல்லாதவள்.

     அரம்பையரும்கூட இரங்கினர், சந்திரமதி அல்லும் பகலும் நெற்
குற்றி வருந்துவது கண்டு. ஆயினும், மறையவனும் அவன் மனைவியும்
மனஞ்சிறிதும் இரங்கிலர் என்பது. இன்கண் - இரக்கம்; வன்கண்
என்பதற்கு எதிர்மறை மொழி என்க.
                                                     (3)

 

980.	அடியினால் அஞ்சி மைந்தன் அனந்தலைப் பயமு ணர்த்த விடியுமுன் னெழுந்தி ருந்து விளைபுலங் களைப றித்துக் கடிவனத் தடகு கொய்து காட்டமும் சமிதை யும்பொன் முடிபுனை தலையில் வைத்து முறைமுறை வருமந் நாளில்.

     (இ - ள்.) மைந்தன் அடியினால் அஞ்சி - தேவதாசன்
மறையோன் அடித்த அடியினால் அச்சங்கொண்டு, பயம் அனந்தலை
உணர்த்த - அந்தப் பயம் உறக்கத்தை நீக்க, விடியுமுன் எழுந்திருந்து -
அதனாற் பொழுது விடிவதற்குமுன் எழுந்திருந்து, விளை புலம் களை
பறித்து - விளைநிலத்திலே களையவேண்டிய களையைப் பறித்து நீக்கி
விட்டு, கடி வனத்து அடகு கொய்து - காவல் உள்ள காட்டிலே
கிரைகளைக் கொய்து, காட்டமும் சமிதையும் - அடுப்புக்குரிய விறகும்
ஒம விறகும், முடி புனை