தலையில் வைத்து முறை முறை வரும் அந் நாளில் - பொன் முடி
புனையும் தலையில் வைத்து முறையாகக் கொண்டு வரும் அந்த நாளில்;

     அனந்தல் - உறக்கம்; உணர்த்த - நீக்க. முதல் நாள் பட்ட
அடியால் விளைந்த அச்சம் மறுநாள் சிறுவன் துயிலை உணர்த்தியது.
தானே உணர்ந்து எழுந்து விடுகிறான் என்பது. களை பறித்தல் காலையில்
செய்யும் வேலை. அடகு - ஆல், புரசு இவற்றின் இலை என்றும்
கொள்ளலாம். தைத்து உண்கலமாகக் கொள்வதற்கு இவை பயன்படும்.
காட்டம் - விறகு. சமிதை - ஓமம் வளர்க்கும் ஒன்பது வகை விறகுக்
குச்சிகள், அவை : (1) முருக்கு, (2) கருங்காலி, (3) நாயுருவி, (4) அரசு, (5)
அத்தி, (6) மா, (7) வன்னி, (8) ஆல், (9) இத்தி என்பன.
                                                     (4)

 

	தேவதாசன் விறகெடுக்க வனத்திற்குச் செல்லல்
981.	மைந்தனும் சிறாரோ டேகி வனந்தனில் விறகு கட்டித் தந்திடு வழியி னோர்பாற் றருப்பைகண் டிதுவிட் டேகில் அந்தணன் முனிவா னென்னா வஞ்சியோர் வடத்தி னீழல் இந்தனம் இறக்கி யப்பு லிருந்திடு புதர்க்கட் சென்றான்.

       (இ - ள்.) மைந்தனும் சிறாரோடு ஏகி - தேவதாசன் மற்றை
வீட்டுச் சிறுவர்களுடன் சென்று, வனந்தனில் விறகு கட்டித் தந்திடு
வழியின் ஓர்பால் - காட்டில் உள்ள விறகைக் கட்டிக்கொண்டு வருகின்ற
வழியில் ஒருபக்கம், தருப்பை கண்டு இது விட்டு ஏகில் - தருப்பையைப்
பார்த்து இதனை விடுத்துச் சென்றால், அந்தணன் முனிவான் என்னா
அஞ்சி - மறையவன் சினந்து தண்டிப்பான் என்று பயந்து, ஓர் வடத்தின்
நீழல் இந்தனம் இறக்கி - ஓர் ஆலமரத்தின் அடியில் விறகை
இறக்கிவைத்துவிட்டு, அப்புல் இருந்திடு புதர்க்கண் சென்றான் - அந்தப்
புல் இருக்கும் புதரிடத்தில் சென்றான்.

     வடம் - ஆலமரம். நிழல் : நீழல் என நீண்டது விகாரம். இந் தனம்
- விறகு. புல் - தருப்பைப் புல். ஒருநாள், தேவதாசன் விறகெடுத்து
வரும்போது தருப்பைப்புல் இருக்கும் இடங் கண்டு விறகுக் கட்டை
இறக்கிவைத்துத் தருப்பை கொய்யச் சென்றான் என்பது.
                                                     (5)

 

	தேவதாசனைப் பாம்பு கடித்தல்
982.	பறித்தனன் குசையைப் பற்றிப் பறித்தலும் முனிவன் ஏவக் குறித்துவந் ததனுட் டங்குங் கோளராச் சீறி யோங்கித் தெறித்தழல் விழியாற் சிந்தத் தீண்டிற்றுத் தீண்ட லோடும் வெறித்தெழுந் தலறி யோடி வெருவியே தரையில் வீழ்ந்தான்.

     (இ - ள்.) குசையைப் பற்றிப் பறித்தனன் - தருப்பையைப்
பிடித்துப் பறித்தான், பறித்தலும் - பறித்தவுடன், முனிவன் ஏவக் குறித்து
வந்து அதனுள் தங்கும் கோளராச் சீறி ஓங்கி - முனிவன் ஏவுதலினால்
குறிப்பாக வந்து அதனுள் தங்கியிருந்த கொல்லும் பாம்பு சீறிப்
படமெடுத்து நின்று,