(இ - ள்) மடத்தகை வல்லி பின்னும் மைந்தரை நோக்கி -
இளமைத்தன்மை பொருந்திய வல்லிக்கொடி போன்ற சந்திரமதி மேலும்
அச் சிறுவர்களை நோக்கி, எந்த இடத்திலே இறந்தான் என்ன - எந்த
இடத்திலே இவன் இறந்தான் என்று கேட்க, யாம் வரும் வழியில் நிற்கும்
வடத்தினுக்கு அயலே சற்று வடக்கினில் - யாங்கள் வருகின்ற வழியில்
நிற்கின்ற ஆலமரத்துக்குப் பக்கத்தில் சற்று வடக்கில், குசை படர்ந்த
தடத்தினில் தெற்கே என்று சாற்றியே அவர்கள் போனார் - தருப்பை
படர்ந்த இடத்திற்குத் தெற்கே என்று கூறி அவர்கள் சென்றார்கள்.

     சந்திரமதி தெளிந்து எழுந்து 'எவ்விடத்தில் இறந்துகிடக்கின்றான்!'
என்றாள்; வழியினிற்கும் ஆலமரத்திற்கு வடக்கில் தருப்பை படர்ந்த
இடத்திற்குத் தெற்கில் என்று கூறிச் சென்றனர் அச்சிறார்கள்.
                                                    (11)

 

988.	அறுதியீ தென்று சால வறிவழிந் துருகி வீழ்ந்து மறுகினா ளுடையோர்க் கஞ்சி வாய்திறந் தரற்றாள் மாழ்கிச் சிறுதொழின் முழுதும் செய்து தீர்ந்தபின் றேடிச் சேறல் உறுதியென் றுளத்தி னுள்ளே ஒடுக்கிவந் தகத்திற் புக்காள்.

     (இ - ள்) அறுதி ஈது என்று சால அறிவு அழிந்து உருகி வீழ்ந்து
- முடிவு இது என்று மிகவும் அறிவு கெட்டு மனம் உருகி வீழ்ந்து,
மறுகினாள் - மயங்கிக்கிடந்தாள், உடையோர்க்கு அஞ்சி வாய் திறந்து
அரற்றாள் - தன்னை விலைகொடுத்து வாங்கிய மறையோனுக்கும் அவன்
மனைவிக்கும் அஞ்சி வாய் திறந்து அழாதவளாய், மாழ்கிச் சிறு தொழில்
முழுதும் செய்து தீர்ந்தபின் - மனம் வருந்திச் செய்ய வேண்டிய
சிறுதொழில்கள் முழுவதும் செய்து முடிந்தபிறகு, தேடிச் சேறல் உறுதி
என்று உளத்தின் உள்ளே ஒடுக்கி வந்து - தேடிச் செல்வதுதான் முடிவு
என்று மனத்தினுள்ளே கவலையை ஒடுக்கிக் கொண்டு வந்து, அகத்திற்
புக்காள் - மனையினுள் புகுந்தாள்.

     உடையோர்க்கு அஞ்சி என்றது, தன்னை விலைக்கு வாங்கிய
மறையோனுக்கும் அவன் மனைவிக்கும் பயந்து என்ற பொருளை
யுணர்த்திற்று. தனக்குரிய பணிகளைச் செய்து முடித்தபின்
தேடிச்செல்வதென உறுதி கொண்டாள் சந்திரமதி. சிறுதொழில் -
குற்றேவல். இது மனையிலுள்ள கலம் கழுவுதல், உடை தோய்த்தல்
முதலிய தொழில்களை யுணர்த்தும்.
                                                    (12)

 

	சந்திரமதி தன் மைந் தனிறந்தது கூறி மறையோனிடம்               விடை கேட்டல்
989.	முறைமுறை பணிக ளெல்லாம் செய்தற முடித்துப் பின்னர் மறையவன் றன்னை ஏத்தி வாய்புதைத் தழுது விம்மி