காசி யரசன் மைந்தன் இறந்துகிடக்கக் கண்டு            திகைத்து நிற்றல்
1043.	அம்மதலை யைத்தெரு வகத்தினிடை காணா இம்மதலை யார்மதலை என்னவல மந்தாள் எம்மதலை யைக்கணம் எறிந்ததுகொல் என்னாத் தம்மதலை மெய்க்குறி தனைத்தெரித லுற்றாள்.

     (இ - ள்.) அம் மதலையைத் தெரு அகத்தின் இடை காணா -
அக் குழந்தையைத் தெருவிலே கண்டு, இம் மதலை யார் மதலை என்ன
அலமந்தாள் - இந்தப் பிள்ளை யார் குழந்தை என மனம் வருந்தினாள்,
எம் மதலையைக் கணம் எறிந்ததுகொல் என்னா - எம்முடைய
பிள்ளையைப் பேய்க்கூட்டம் கொண்டுவந்து எறிந்ததோ என்று, தம்
மதலை மெய்க்குறிதனைத் தெரிதல் உற்றாள் - தம் பிள்ளையின் உடம்பு
அடையாளம் இருக்கிறதோ என ஆராயத்தொடங்கினாள்.

     காணா : (கண்டு) செய்யா என்னும் வாய்பாட்டு வினையெச்சம்.
அமைந்தாள் - "அலமரல் தெருமரல் ஆயிரண்டும் சுழற்சி" என்ப.
ஆகலின் மயங்கினாள் என்பது பொருள். கணம் - பூதகணம், பேய்க்
கணம் என்னும் இரண்டும் ஆம். தன் மைந்தனைப்போல உருவமும்
பருவமும் ஒத்திருந்ததால் அடையாளம் பார்க்கத் தொடங்கினாள் என்று
கொள்க.
                                                    (67)

 

	காவலர் வந்து சந்திரமதியைப் பிடித்தல்
1044.	விடிந்திடு முனந்நகரி காவலர் விரைந்தே இடிந்தமதி லேறியு மிழிந்துமறு குற்று மடிந்தகுழ விக்கருகு கண்டுமட மாதைக் கடிந்தனர் கொணர்ந்துயிர் கவர்ந்ததிவள் என்றே.

       (இ - ள்.) அ நகரி காவலர் விடிந்திடும் முன் விரைந்தே - அந்
நகரத்தைக் காவல் காப்பவர் பொழுது விடிவதற்குமுன் விரைந்து, இடிந்த
மதில் ஏறியும் இழிந்தும் மறுகு உற்று - இடிந்து கிடக்கும் மதில் வழியில்
ஏறியும் இறங்கியும் தெருவை அடைந்து, மடிந்த குழவிக்கு அருகு
மடமாதைக் கண்டு - இறந்துகிடக்கும் குழந்தைக்கு அருகில்
சந்திரமதியைக் கண்டு, உயிர் கவர்ந்தது இவள் என்றே - இவளே
குழந்தையைக் கொன்று உயிரைக் கவர்ந்தாள் என்று, கொணர்ந்து
கடிந்தனர் - கொண்டுவந்து கடுமையாகக் கடிந்து பேசத் தொடங்கினர்.

     மன்னன் மகனாதலால் காவலர் உடனே தேடிவந்தனர்; இடிந்த
சுவர்களில் ஏறியும் இறங்கியும் ஆராய்ந்து தேடிவரும்போது தெருவிற்
பிணத்தையெடுத்துப் பார்க்கும் சந்திரமதியைக் கண்டனர். 'இவள்
கொன்றவள்' என்று சினந்து பேசினர்; அடிக்கத்தொடங்கினர்.
                                                    (68)

 

1045.

பதைத்திடு சினத்தொடு பசுங்குழவி தன்னை வதைத்ததிவ ளாமென மலர்க்குழல்பி டித்தே