இவ்வாறு பலரும் புலம்பி வருந்த அரிச்சந்திரன் தன் மனைவியைக்
கட்டிய கயிற்றைப் பிடித்திழுத்துக்கொண்டு தெருக்களைக் கடந்து
கோட்டையின் வெளிப்புறம்வந்து தங்கினான் என்பது.
                                                   (122)

 

	விண்ணுலகில் இந்திரனுக்கு வசிட்டர் கூறியது
1099.	உற்ற நாளையில் வசிட்டனவ் வும்பர்கோன் தனக்குக் கொற்றவா நினக்கு யான்புகல் கோதிலான் இடத்தே அற்றை நாள்முதல் கௌசிகன் அமைக்குமூ றனைத்தும் இற்றை நாள்விடும் காண்பம்நீ எழுகவென் றிசைத்தான்.

       (இ - ள்.) உற்ற நாளையில் - அரிச்சந்திரன் மதிற்புறத்தை
அடைந்த போதில், வசிட்டன் அ உம்பர் கோன் தனக்கு - வசிட்ட
முனிவன் அந்த இந்திரனைப் பார்த்து, கொற்றவா நினக்கு யான் புகல்
கோதிலான் இடத்தே - மன்னனே! உனக்கு யான் கூறிய குற்றம் இல்லாத
அரிச்சந்திரனிடத்தே, அற்றை நாள் முதல் கௌசிகன் அமைக்கும் ஊறு
அனைத்தும் - அன்று முதலாகக் கௌசிகன் செய்து வந்த துன்பங்கள்
எல்லாம், இற்றை நாள் விடும் - இன்று நீங்கிவிடும், காண்பம் நீ எழுக
என்று இசைத்தான் - அதனைக் காண்போம் புறப்பட்டு வருக என்று
கூறினான்.

     வசிட்டன் இந்திரனை நோக்கி, "முன்னாளில் யான்
'குற்றமில்லாதவன் அரிச்சந்திரன்' என்று கூறினேன்; அவனைக்
குற்றமுள்ளவ னாக்குவதற்குக் கோசிகன் பலவிதமான இடையூறு
செய்தான்; அவை எல்லாம் நீங்கிடும் நாள் இந்நாள் ஆகும். அதனைக்
காண்பதற்கு வருக" என்று கூறினன்.
                                                   (123)

 

	மேலுலகத்தாரனைவரும் நின்று அரிச்சந்திரன்          செயல் காண்டல்
1100.	தாழும் வார்சடை மாமுனி அவ்வுரை சாற்றச் சூழும் மாதரும் தும்புரு நாரதர் தாமும் வாழும் வச்சிர பாணியும் வசிட்டனும் யாரும் ஏழு பாலரும் காணவந்(து) அந்தரத் திருந்தார்.

     (இ - ள்.) தாழும் வார் சடை மாமுனி அவ்வுரை சாற்ற -
தாழ்ந்து நீண்டுள்ள சடையினையுடைய வசிட்டமாமுனிவன்
அவ்வுரைகளைச் சொன்னவுடன், சூழும் மாதரும் தும்புரு நாரதர் தாமும்
- சூழ்ந்துள்ள அரம்பையர்களும் தும்புரு நாரதர் என்னும் முனிவர்களும்,
வாழும் வச்சிர பாணியும் - வளம்பெற்று வாழ்கின்ற வச்சிரப்
படையினையுடைய இந்திரனும், வசிட்டனும் யாரும் ஏழு பாலரும் -
வசிட்டமுனிவரும் மற்றவர்களும் ஏழு திசைக் காவலரும், காண வந்து
அந்தரத்து இருந்தார் - காண்பதற்காக வந்து வானத்திலே தங்கி
இருந்தார்கள்.