வாமமே கலையாள் தனைவிலை கொண்டு    மறையவ னாகியாண் டுறைந்த தூமகே துவுங்கங் காளனார் திருமுன்    தோன்றிநின் றினையன சொல்வான்.

     (இ - ள்.) சுடலை காத்திருப்பது எனக்கு ஆமதே - சுடலையைக்
காத்துக்கொண்டிருப்பதுவே எனக்குத் தக்கது, அவனி காத்திருப்பதற்கு
அங்ஙன் போமதே நினக்குத் தொழில் - மாநிலத்தைக் காப்பதற்கு
அங்குச் செல்வதே உனக்கு உரிய தொழிலாகும், என மறுத்துப் புரவலன்
உரைப்பது கேளா - என்று மறுத்து மன்னன் உரைத்த மொழிகளைக்
கேட்டு, வாம மேகலையாள் தனை விலை கொண்டு மறையவன் ஆகி
ஆண்டு உறைந்த - அழகிய மேகலையை அணிந்த சந்திரமதியை
விலைக்குப் பெற்று வேதியனாகி அங்குத் தங்கிய, தூமகேதுவும்
கங்காளனார் திருமுன் தோன்றி நின்று இனையன சொல்வான் -
நெருப்புக்கடவுளும் சிவபெருமான் திருமுன் தோற்றமளித்து நின்று பின்
வரும் மொழிகளைக் கூறினான்.

     தூமகேது - நெருப்பு; தீத்தெய்வம் அரசன் கூறிய மொழிகளைக்
கேட்டு அக்கினிபகவான் அங்கு வந்தான் என்பது. அவன் காசியில் ஒரு
மறையவனாக வந்திருந்து அரிச்சந்திரன் மனைவியையும் தேவதாசனையும்
விலைக்கு வாங்கியவன். அவன் கூறுகிறான்.
                                                    (34)

 

	சந்திரமதியை விலைக்குக் கொண்ட மறையவன்         (தீக்கடவுள்) கூறுதல்
1147.	என்னைநீ யுரைத்தாய் எனக்குவிற் றதுவும்    இகழ்ச்சியோ இவள்விலை படுதல் முன்னமே யுணர்ந்து கொள்வதற் கிசைந்து    முதுமறைக் குலத்துவந் துதித்து மின்னையும் மைந்தன் தன்னையும் விற்க    விலைகொண்ட ஆவணம் ஈதென்(று) அன்னைபங் காளன் திருமுனே வைத்தான்    அரசனும் அதிசயம் உற்றான்.

       (இ - ள்.) என்னை நீ உரைத்தாய் எனக்கு விற்றதுவும்
இகழ்ச்சியோ - நீ என்ன கூறினாய்! எனக்கு உன் மனைவியாகிய
சந்திரமதியையும் மைந்தனாகிய தேவதாசனையும் விற்றதும் இகழத் தக்க
செயலாகுமோ?, இவள் விலை படுதல் முன்னமே உணர்ந்து - இவள்
விலைக்கு விற்கப்படுதலை முன்னரே தெரிந்துகொண்டு, கொள்வதற்கு
இசைந்து - வாங்குவதற்கு மனம் விரும்பி, முது மறை குலத்து வந்து
உதித்து - பழைமையான மறையவர் குலத்தில்வந்து தோன்றி, மின்னையும்
மைந்தன் தன்னையும் விலை கொண்ட ஆவணம் ஈது என்று -
சந்திரமதியையும் தேவதாசனையும் விலைக்கு வாங்கிக்கொண்டதற்கு
எழுதிய விற்பனைச் சீட்டு இது என்று, அன்னை பங்காளன் திருமுனே
வைத்தான் - உமாதேவியை இடப்பாகத்திலுடைய சிவபெருமான் திருமுன்
வைத்தான், அரசனும் அதிசயம் உற்றான் - மன்னன் அதனைக் கண்டு
வியப்பு அடைந்தான்.