பார்த்து, அரச நீ அயோத்தியின் அணுகி - அரசனே! நீ
அயோத்திமாநகரத்தை அடைந்து, தீங்கு அற மகுடம் சூட்டி - குற்றம்
நீங்க மகுடம் சூட்டிக்கொண்டு, இம் முனிவன் செய் தவம் பாதியும்
கொண்டு - இந்த விசுவாமித்திரமுனிவன் செய்த தவத்திற் பாதியைக்
கைக்கொண்டு, வாங்கு நீர் உலகம் பொதுவறப் புரந்து - வளைந்த
கடலாற் சூழப்பட்ட இம் மண்ணுலகத்தைப் பிறர்க்குப் பொதுவன்று
என்னும்படி சிறப்பாக ஆண்டு, வருதி எம் பதத்தினில் என்னா -
முடிவில் எம்முடைய பதத்திற்கு வருவாயாக என்று கூறி விட்டு, தேவர்
கோமாற்கு உரை செய்வான் - தேவர் தலைவனாகிய இந்திரனை
நோக்கிப் பின் வருமாறு கூறினான்.

     சிவபெருமான் அரிச்சந்திரனை நோக்கி 'இச் செயல்கள் யாவும்
நின்னைச் சோதிப்பதற்குச் செய்தனவே! தெய்வங்கள் வந்து உன்னையும்
உன் மனைவி மைந்தனையும் விலைக்கு வாங்கினர்போலும்! ஆதலால்,
இழிவுனக்குச் சிறிதும் இல்லை; நீ முன்னிருந்தபடியே அரசு புரிக!'
என்றான்.
                                                    (40)

 

	சிவபெருமான் இந்திரனுக்கு ஆணை தருதல்
1153.	காரணம் ஒன்று கேட்டியால் நீயும்    காசிபன் முதல்முனி வரரும் வாரண வாசி மன்னனும் அயோத்தி    மன்னவன் தன்னுடன் ஏகித் தோரண வீதித் திருநகர் புகுந்து    சுடர்முடி சூட்டிய பின்னர் ஊரணைந் திடுகென் றுரைத்திட வணங்கி    உவகையால் அன்னவர் உரைப்பார்.

       (இ - ள்.) காரணம் ஒன்று கேட்டியால் - இந்திரனே!
உனக்குச் சொல்லும் காரியம் ஒன்றைக் கேட்பாயாக, நீயும் காசிபன்
முதல் முனிவரரும் - நீயும், காசிபன் முதலான முனிவர்களும், வாரண
வாசி மன்னனும் அயோத்தி மன்னவன் தன்னுடன் ஏகி - காசி நகரத்து
மன்னனும் அயோத்தி நகரத்து அரசனாகிய அரிச்சந்திரனுடன் சென்று,
தோரண வீதி திருநகர் புகுந்து - தோரணங்கட்டிய வீதிகளையுடைய
அழகிய அயோத்தி மாநகரத்தையடைந்து, சுடர்முடி சூட்டிய பின்னர் -
அரிச்சந்திரனுக்கு ஒளிவீசும் முடியினைச் சூட்டிய பிறகு, ஊர்
அணைந்திடுக என்று உரைத்திட - உங்கள் ஊரினைச் சேர்வீர்களாக
என்று கூறியவுடன், வணங்கி உவகையால் அன்னவர் உரைப்பார் -
வணக்கஞ் செய்து மகிழ்ச்சியினால் இந்திரன் முதலானவர் கூறத்
தொடங்கினர்.

     சிவபெருமான் இந்திரனை நோக்கி 'நீயும் காசிபன் முதலிய
முனிவர்களும் காசிநகர் மன்னனும் அரிச்சந்திரனுடன் அயோத்திக்குச்
சென்று அவனுக்கு முடி சூட்டிவிட்டுப் பின் உங்களூர் செல்லுங்கள்'
என்று ஆணை தந்தனர்.
                                                    (41)