சிவபெருமான் ஆணையையேற்று அடிபணிதல்
1154.	திங்கள்மே வியசெஞ் சடைமுடி யாய்நின்    திருவுளத் தின்படி யல்லால் எங்களமாட் சிமைவே றிலையென அளித்த    ஏவல்தந் தலைமிசைக் கொண்டார் அங்கண்மா ஞாலம் அகன்றெழுந் தீசன்    அணிதிகழ் கயிலையிற் புக்கான் செங்கண்மால் ஏகிப் பாற்கடல் புகுந்தான்    திசைமுகன் தனதுல கடைந்தான்.

     (இ - ள்.) திங்கள் மேவிய செஞ்சடை முடியாய் - திங்களை
அணிந்த சிவந்த சடைமுடியுடைய இறைவனே!, நின் திருவுளத்தின் படி
அல்லால் - உன் மனக்கருத்தின்படி யல்லாமல், எங்கள் மாட்சிமை வேறு
இலை என்ன - எங்கள் பெருமை வேறு இல்லை என்று, அளித்த ஏவல்
தம் தலைமிசைக் கொண்டார் - இறைவன் அளித்த ஏவலைத் தம்முடைய
தலையின்மேல் கொண்டார்கள், அம் கண் மா ஞாலம் அகன்று எழுந்து
ஈசன் அணி திகழ் கயிலையில் புக்கான் - அழகிய இடமகன்ற இம்
மண்ணுலகத்தை விட்டு நீங்கிச் சிவபெருமான் அழகிய கயிலைமலையை
அடைந்தான், செங்கண் மால் ஏகிப் பாற்கடல் புகுந்தான் - சிவந்த
கண்களையுடைய திருமால் சென்று பாற்கடலிலே புகுந்தான், திசைமுகன்
தனது உலகு அடைந்தான் - நான்கு முகங்களையுடைய அயன் தன்
பிரமலோகத்தை அடைந்தான்.

     சிவபெருமான் ஆணையை ஏற்று இந்திரன் அயோத்திக்குச்
சென்றான்; திருமால் திருப்பாற்கடலுக்குச் சென்றான்; பிரமன் அவனுலகம்
புகுந்தான்; சிவபெருமானும் கயிலைக்குச் சென்றார் என்பது.
                                                    (42)

 

	அறுசீர்க்கழி நெடிலடி ஆசிரியவிருத்தம்
1155.	கருத்தினின் மகிழ்ச்சி யோங்கக் கடவுளர் ஏவல் மாறா(து) அருத்திகொண் டேகித் தத்தஞ் சார்பினில் அடைந்த பின்னர் வருத்தமும் வினையும் மாற்றி மன்னனை மகுடஞ் சூட்டி இருத்திநாம் போவோம் என்னா இந்திரன் இனிதி ருந்தான்.

       (இ - ள்.) கடவுளர் கருத்தினில் மகிழ்ச்சி ஓங்க ஏவல் மாறாது
- தேவர்கள் மனத்தில் மகிழ்ச்சியுடையவர்களாய் இறைவன் இட்ட
கட்டளையை மாறாமல், அருத்தி கொண்டு ஏகி தத்தம் சார்பினில்
அடைந்த பின்னர் - விருப்பங்கொண்டு சென்று தங்கள் தங்களுடைய
இருப்பிடங்களில் சேர்ந்த பிறகு, இந்திரன் மன்னனை வருத்தமும்
வினையும் மாற்றி மகுடஞ் சூட்டி இருத்தி - இந்திரன் அரிச்சந்திர
மன்னனுக்கு உண்டான வருத்தத்தையும் தீவினைகளையும் நீக்கிவிட்டு
முடிசூட்டி அரியணையில் இருக்கச்செய்து, நாம் போவோம் என்னா இனிது
இருந்தான் - நாம் பிறகு செல்லுவோம் என்று இனிமையாக இருந்தான்.