மீண்டு வருவதைக் கண்டு, கங்கை மா நதி பெருகிற்று அன்றே - கங்கை
என்னும் பேராறு வெள்ளப்பெருக்கெடுத்து விளங்கியது.

     அரசனையும் சந்திரமதியையும் தேவதாசனையும் கண்ட கங்கை
யாறு கன்றைக் கண்ட பசுவின் மடி பால் சுரந்தது போலப் பெருகியது.
இஃது உவமையணி.
                                                    (55)

 

1168.

வரைபல உருட்டி நீண்ட மரம்பல பிடுங்கி வெள்ளை நுரைபல சிதறி எங்கும் நூறையும் வராலும் பாய நிரைநிரை பதும ராக நித்திலங் கொழித்தி ரண்டு கரையையுங் கடந்து காந்தக் கடலென வந்த தன்றே.

       (இ - ள்.) வரை பல உருட்டி நீண்ட மரம் பல பிடுங்கி -
கற்கள் பலவற்றை உருட்டிக்கொண்டும் நீண்ட மரங்கள் பலவற்றைப்
பிடுங்கிக்கொண்டும், வெள்ளை நுரை பல சிதறி எங்கும் நூறையும்
வராலும் பாய - வெண்மையான நுரை பலவற்றைச் சிதறிக்கொண்டும்
எவ்விடத்தும் மலங்கு மீனும் வரால் மீனும் பாயும்படி, நிரை நிரை
பதுமராகம் நித்திலங் கொழித்து - வரிசை வரிசையாகப் பதுமராகம்
முத்து என்னும் மணிகளைக் கொழித்துக் கரையிலே சிந்தி, இரண்டு
கரையையும் கடந்து உகாந்தக் கடல் என வந்தது - இரண்டு
கரைகளையும் உடைத்துக்கொண்டு ஊழிக் காலத்துக் கடல் பெருகுவது
போல வந்தது.

     'வரை' என்பது ஆகுபெயராய் அதன் உறுப்பாகிய கல்லினை
யுணர்த்தியது. வரை மூங்கில் எனவும் கூறலாம். நூறை - மலங்கு என்ற
மீன்.
                                                    (56)

 

	கங்கைக் கரையின்கண் தங்குதல்
1169.	விரிகடல் என்ன வந்த விமலையின் கரையில் ஏறிச் சொரிமலர்ச் சூழல் தோறும் சுடர்மணிப் பாறை தோறும் வரிமணல் வண்டல் தோறும் மால்வரைச் சாரல் தோறும் தெரிவையர் குழாமும் தேவர் சேனையும் அடைந்த அன்றே.

     (இ - ள்.) விரி கடல் என்ன வந்த விமலையின் கரையில் ஏறி -
பரந்த கடல்போல் வந்த கங்கையின் கரையில் ஏறி, சொரி மலர்ச் சூழல்
தோறும் சுடர் மணிப் பாறை தோறும் - சொரிகின்ற மலர்களையுடைய
சோலைகளிலும் ஒளிவீசும் மாணிக்கப் பாறைகளிலும், வரி மணல்
வண்டல் தோறும் - அடுக்கு மலைபோன்ற மணற்குவியல்களிலும், மால்
வரைச் சாரல் தோறும் - பெரிய மலைப்பக்கங்களிலும், தெரிவையர்
குழாமும் தேவர் சேனையும் அடைந்த அன்றே - பெண்கள் கூட்டமும்
தேவர் கூட்டமும் அடைந்து தங்கியிருந்தனர்.

     விமலை - குற்றமில்லாதவள்; தூய்மையுடையவள் எனப் பொருள்
தந்து கங்கையை யுணர்த்தியது. 'விமலன்' எனக் கடவுளுக்குப் பெயர்
கூறுவதும் இக்காரணம் கருதிய தென்க. வரி மணல் : வினைத் தொகை;
வரிவரியாகக் கோலமிட்டதுபோன்ற மணல் என்று கொள்க.
                                                    (57)