அவர்க்கே அவளை மணஞ்செய்து கொடுக்கவேண்டும் என்பது. எலாம் :
எல்லாம் என்பதன் தொகுத்தல்; கொடாது : எதிர்மறை வினையெச்சம்.
கொடு : பகுதி; ஆ : எதிர்மறை இடைநிலை; த் : எழுத்துப்பேறு; உ :
வினையெச்ச விகுதி; அன்றி : குறிப்பு வினையெச்சம்; கடி மணம் :
உரிச்சொற்றொடர். முடிக்கிலேன் - முடி : பகுதி : கு : சாரியை; இல் :
எதிர்மறை இடைநிலை; ஏன் : தன்மை ஒருமை வினைமுற்று விகுதி.
                                                    (18)

 

	மன்னவன் காதல் வளர்ச்சி
123.	பாதகம் என்னாக் கடிந்தகா மத்தீப்    பங்கமுற் றுறைவிடம் பெறாது மாதவர் உரைத்த மொழிவழி வந்து    மன்னவன் செவிவழிப் புகுந்தாங் கூழைவந் தலைக்கும் வெளிவிளக் கதனின்    உளமலை வுறவலைத் தோங்கிக் காதலங் கொழுந்து வளர்ந்திட உருகிக்    கனலினி லிடுமெழு கானான்.

     (இ - ள்.) பாதகம் என்னாக் கடிந்த காமத்தீ பங்கமுற்று உறைவு
இடம் பெறாது மாதவர் உரைத்த மொழிவழி வந்து மன்னவன் செவி வழி
புகுந்த ஆங்கு - பழி என்று நீக்கிய காமத்தீயானது முனிவர்
மொழிகளாகிய காற்றால் அசைவுற்றுத் தங்கும் இடம் பெறாது அதன்
வழியே வந்து அரசன் காதுகளில் புகுந்து, அங்கே ஊதை வந்து
அலைக்கும் வெளி விளக்கு அதனின் - காற்று வந்து மோதி அசைக்கும்
வெளியிடத்தில் வைத்த விளக்குப்போல, உளம் மலைவுற அலைத்து -
மனத்தை மயங்கி அலமரச்செய்து, காதல் அம் கொழுந்து ஓங்கி
வளர்ந்திட - காதலாகிய அழகிய கொழுந்து உயர்ந்து தளிர்த்துவளர,
உருகிக் கனலிடை மெழுகு ஆனான் - உள்ளம் உருகித் தீயிலிட்ட
மெழுகு போல் ஆயினான்.

     என்னா : செய்யா என்னும் வாய்பாட்டு வினையெச்சம்; காமத்தைத்
தீயாகவும், முனிவர் மொழியைக் காற்றாகவும் உருவகப்படுத்தினமையின்
உருவக அணி. ஊதை வந்தலைக்கும் வெளிவிளக் கதனின் : உவமை
யணி; கலவை அணி.
                                                    (19)

 

124.	சந்திர கலையால் நெக்குநீர் பொழிவ    சந்திர காந்தமே அல்லால் அந்தர சாதிச் சிலையினுண் டாகா    தவளிவன் மனைவியென் றயனார் முந்தவே விதித்த விதியினால் அடங்கா    மோகமும் தாகமும் மிகுந்து புந்திகெட் டறிவு நிறைபொறை தோற்றம்    போக்கினான் யாக்கையும் தளர்ந்தான்.