கேட்பாயாக, யாங்கள் மீண்டு போதலும் செய்வேம் உங்கள் புது மணம்
காண்பேம் ஆயின் - நாங்கள் திரும்பி வருவோம் உங்கள் சிறந்த
திருமணமும் காண்போமானால், ஈது அலால் உறுதி வேறொன்று இல்லை
என்று எழுந்திருந்தார் - சிவபெருமான் அன்பராகிய உமக்கு இவ்வுதவி
செய்தலினும் சிறந்த நன்மை வேறொன்றும் இல்லை என்று சொல்லி
எழுந்தார்கள்.

     காண்பேம்; தன்மைப்பன்மை வினைமுற்று. எழுந்திருந்தார் -
எழுந்திரு பகுதி.
                                                    (24)

 

	முனிவர் மதிதயன்பாற் செல்லல்
129.	சந்திர வதிதன் பார தனங்கள்உன் சைல தாமச் சுந்தர மார்பின் மூழ்கச் சூட்டுவேம் என்ன வாழ்த்தி மந்திர முனிவர் எல்லாம் மண்டபம் அகன்று நீங்கி இந்திர புரியே அன்ன வெழில்நகர் கடந்து போனார்.

     (இ - ள்.) சந்திரவதி தன் பார தனங்கள் உன் சைல தாமம் சுந்தர
மார்பின் மூழ்கச் சூட்டுவேம் என்ன வாழ்த்தி - சந்திரமதியின் பெரிய
கொங்கைகள் உனது மலைபோன்ற மாலையணிந்த அழகிய மார்பில்
அழுந்தும்படி மணமாலை சூட்டுவோம் என்று வாழ்த்தி, மந்திர முனிவர்
எல்லாம் - நிறைமொழி மாந்தர் எல்லாரும், மண்டபம் அகன்று நீங்கி
இந்திர புரியே அன்ன எழில் நகர் கடந்து போனார் -
அரிச்சந்திரனுடைய கொலு மண்டபம் நீங்கி அமராவதிநகர் போன்ற
அழகு நிறைந்த அயோத்திநகரினைக் கடந்து போனார்கள்.
     அன்ன : உவம உருபு.
                                                    (25)

 

	மன்னவன் காதலால் மயங்குதல்
130.	மாதவர் போன பின்னர் மண்டபம் நீங்கி மன்னன் ஆதுலர் போலப் பள்ளி அறைபுகுந் தமளி நண்ணி மீதெலாம் அனங்க வாளி குளித்திட வெளியிற் புக்குக் காதலங் கடலுள் தாழ்ந்தான் கரைநிலை கண்டி லாதான்.

     (இ - ள்.) மாதவர் போன பின்னர் மன்னன் மண்டபம் நீங்கி -
முனிவர் போன பிறகு அரசன் கொலுமண்டபத்திலிருந்து போய், ஆதுலர்
போலப் பள்ளி அறை புகுந்து - வறியவர் போலப் படுக்கை அறையில்
சென்று, அமளி நண்ணி - படுக்கையில் பொருந்தி, மீதெலாம் அனங்க
வாளி குளித்திட - மேலெல்லாம் மன்மதன் அம்புகள் தைக்க, காதல் அம்
கடலுள் தாழ்ந்தான் கரை நிலை கண்டிலாதான் வெளியிற் புக்கான் -
ஆசைக் கடலுள் அழுந்திக் கரை காணாது அதனுள் நிற்றற்கும்
ஆற்றாதவனாகி வெளியே வந்தான்.

     மாதவர் : உரிச்சொற்றொடர்; மண்டபம் : ஐந்தாம்வேற்றுமைத்
தொகை; அரச அணிகளின்றி வேட்கைப்பசி உள்நின் றுடற்றச்
சென்றதனால் 'ஆதுலர் போல்' என்றார். காதல் அம்-அம் : சாரியை.
தாழ்ந்தான்: முற்றெச்சம்;