கதிரோன் மறைவு
179.	தோய்கதிர் வேற்படை சூழ்ந்து துன்னிட ஆய்கதிர் முடியினா னாற்றை நண்ணினான் பாய்கதிர்ப் படலையுட் சுருக்கிப் பையவே காய்கதிர்ச் செல்வனும் கடலை நண்ணினான்.

     (இ - ள்.) தோய் கதிர் வேல் படை சூழ்ந்து துன்னிட - ஒளி
தோய்ந்த வேல் வீரர்கள் சூழ்ந்து நெருங்கிட, ஆய் கதிர் முடியினான்
ஆற்றை நண்ணினான் - ஆராயும் ஒளிபொருந்திய முடியினையணிந்த
அரிச்சந்திரனும் ஆற்றினை அடைந்தான் (அடைந்தபோது), காய்கதிர்ச்
செல்வனும் - எரிகின்ற கதிர்களையுடைய சூரியனும், பாய்கதிர்ப் படலை
உள் சுருக்கிப் பையவே கடலை நண்ணினான் - பரந்த கதிர்க்கூட்டங்களை
உள்ளே சுருக்கிக்கொண்டு மெதுவாக மேலைக் கடலில் போய்
அடைந்தான்.

     அரசன் ஆற்றை அடைந்தான். பொழுதும் அடைந்தது. தோய் கதிர்,
பாய் கதிர், காய் கதிர், ஆய்கதிர் எல்லாம் வினைத்தொகைகள். படலை -
கூட்டம், தொகுதி. ஆய் கதிர் முடி - ஆராய்வதற்கிடமான ஒளிபொருந்திய
முடி. எனவே, அம்முடியை நோக்கினார். இஃது எவ்வகை மணிகளாற்
செய்யப்பட்டதோ, பலவகை யொளி கலந்ததா யிலங்குகின்றதே என்று
ஐயுற்று நோக்கி யாராய்ந்து பார்ப்பதற்குத் தக்க முடி என்று கொள்க.
                                                    (75)

 

	எல்லோரும் ஊர்திவிட் டிறங்குதல்
180.	ஆழவேழ் கருங்கட லதனின் வெய்யவன் வீழலும் மன்னனும் வேந்தர் மக்களும் ஏழையர் யாவரும் இரத மும்கட வேழமும் சிவிகையும் விட்டிறங் கினார்.

     (இ - ள்.) வெய்யவன் ஆழம் ஏழ் கருங்கடல் அதனின் வீழலும் -
சூரியன் ஆழமான ஏழு பெருங்கடலில் இறங்கி மறைந்தவுடன், மன்னனும்
வேந்தர் மக்களும் ஏழையர் யாவரும் இரதமும் கட வேழமும் சிவிகையும்
விட்டு இறங்கினார் - அரிச்சந்திரனும் ஏனைய அரசரும் ஆடவரும்
பெண்களும் ஆகிய யாவரும் தேர் மதயானைகள் பல்லக்குகள் இவைகளை
விட்டு இறங்கினார்கள்.

     சூரியன் வானின்று இறங்குதலும், மக்கள் ஊர்தியினின்று இறங்கலும்
ஒருங்குநிகழ்ந்தன என்பதாம். கடல் எழுவகையாகப் பிரிக்கப்படுதலின் 'ஏழ்
கருங்கடல்' என்றார். ஏழையர் - மங்கையர். மக்கள் என்றது ஆடவரை
மட்டும் குறித்தது; பின் ஏழையர் என வந்த குறிப்பினால்.
                                                    (76)

 

	மன்னனும் படையும் வண்டலின் வதிதல்
181.	மண்டல வேந்தரும் மாத ரீட்டமும் திண்டிற லமைச்சரும் சேனை வெள்ளமும்