இரண்டாவது

சஞ்யந்தன் முத்திச்சருக்கம்.

 141. பஞ்சம கதிக்கட் சென்ற பரமன்றன் சரம மூர்த்திக்
     கஞ்சலி செய்து வாழ்த்திச் சிறப்பயர்ந் தமரர் போனார்
     வஞ்சமி றவத்தி னான்சஞ் சயந்தனும் வணங்கிப் போகி
     எஞ்சலில் கொள்கை தாங்கி யிராப்பகல் படிம நின்றான்.

     (இ-ள்.) பஞ்சம  கதிக்கண்  -  ஐந்தாவதாகிய  மோட்சகதியில்,
சென்ற  -  அடைந்த,  பரமன்றன்   -   வைஜயந்த  பகவானுடைய,
சரமமூர்த்திக்கு - அந்திய சரீரத்திற்கு,  அஞ்சலி செய்து  - வணக்கஞ்
செய்து,  வாழ்த்தி  -  ஸ்தோத்திரம் பண்ணி,  சிறப்பு - பரி நிர்வாண
பூஜையை,   அயர்ந்து - செய்து,   அமரர் - தேவர்கள்,  போனார் -
தங்கள்  தங்களிடம்  சென்றார்கள்,  வஞ்சமில்  -  மாய்கையில்லாத,
தவத்தினான் - தபத்தையுடையவனாகிய,   சஞ்சயந்தனும் - சஞ்சயந்த
முனியும், வணங்கி -(வைஜயந்த  பட்டாரகரை பரிநிர்வாண பூஜையில்)
வணங்கி,    போகி   -   (ஏகவிகாரியாகிப்)   போய்,   எஞ்சலில் -
குறைவில்லாத,  கொள்கை   -   சாரித்திரங்களை,  தாங்கி - தரித்து,
இராப்பகல்   -   இரவும்  பகலும்,   படிமம்  -  ப்ரதிமாயோகத்தில்,
நின்றான் - நிலைபெற்றிருந்தான், எ-று.                       (1)

 142. மான்கன்றும் புலியின் கன்று மாறியே முலையை யுண்ணும்
     ஆன்கன்று மானைக் கன்றுஞ் சிங்கத்தின் கன்றோ டாடும்
     ஊன்றின்று வாழுஞ் சாதி யத்தொழி லொழிந்த வுள்ளந்
     தான்சென்ற சாந்தி யார்க்கும் மாதவன் றன்மை யாலே.

     (இ-ள்.) மாதவன் - மஹா தபஸையுடைய சஞ்சயந்த முனியினது,
தன்மையால் -  குணத்தினால்,    மான்கன்றும்  -  மான்குட்டிகளும்,
புலியின்கன்றும்  -  புலிக்குட்டிகளும்,  மாறி  -   ஒன்றின்   தாயில்
மற்றொன்றுமாறுபட்டு,    முலையை  -    ஸ்தனத்தை   (அதாவது :
தனத்திலுள்ள பாலை),  உண்ணும்  -   குடிப்பனவாகும்  (அதாவது :
மான்குட்டி  புலியினிடத்தும்,  புலிக்குட்டி   மானிடத்தும்    விரோத
குணமின்றிப்     பாலுண்டு      விளையாடும்),     ஆன்கன்றும் -
காட்டுப்பசுவின்கன்றும்,   ஆனைக்கன்றும் - யானைக்  குட்டிகளும்,
சிங்கத்தின் - சிம்மத்தினது,   கன்றோடு  - குட்டிகளோடு,  ஆடும் -
விளையாடும், ஊன்தின்று - மாமிசந்தின்று, வாழும் -வாழ்கின்ற, சாதி
- கீழ்ஜாதிகள்,   அத்தொழில்  -  அக்காரியத்தை,  ஒழிந்த - விட்டு
நீங்கின, யார்க்கும் - எவர்களுக்கும், உள்ளம் - மனம், சாந்தி - சாந்தி
பரிணாமத்தில், சென்ற - சார்ந்தன,எ-று.

      தான், ஏ - அசைகள்.                               (2)