வலம்புரி விநாயகப் படலம்

கலி விருத்தம்

     நிலத்தவர் செய்த தவப்பயனாக விளங்குவீர், நலத்தைத் தருகின்ற
புண்ணிய கோடீசர் தமது மெய்யுணர்வைத் தருகின்ற பெருமையைக்
கூறினோம். இனி அத்திகிரியில் வலம்புரி விநாயகருடைய மாட்சியைக்
கூறுவாம்.

     முன்னோர் காலத்தில் திருமால், பிரமன், முனிவர், விண்ணோர்,
முதலானோர் யாவரும் ஓரிடத்துக் குழுமித் தங்களுள் பேசத் தொடங்கினர்.
‘வஞ்சகராகிய அசுரர் செய்கின்ற சூழ்ச்சிகள் அப்பொழுதே இடையூறின்றிச்
செவ்விதின் முற்றுப் பெறுமாகலின்,

     அந்நிலையே அவர்தம் வஞ்சகச் செயல்களுக்குத் தடையுண்டாக்கவும்,
நஞ்செயல்களுக்குத் தோன்றும் தடைகளை நீக்கி இனிது முற்றுப்
பெறுவிக்கவும் இந்நிலையில்: ஓர் கடவுளை எய்துதற்கு எமது பெருமானுடைய
தாமரை மலரனைய திருவடிகளைத் துதித்து வேண்டுதலைச் செய்வோம்.

இமையவர் இறைவனை வேண்டல்

     என்றுள்ளத்து முடிவு செய்தனர். மந்தர மலையை அடைந்து, திருக்கோயிலினுட்புக்கு எம்முடைய பெருமான் திருமுன்புசென்று நின்று தொழுது தங்குறை இரத்தற்குரிய காலத்தை நோக்கி முன் நின்று வேத தோத்திரங்களைச் செய்தனர்.