மகாலிங்கப் படலம்

கலிநிலைத் துறை

     இளம் பிறையை அணிந்த சடைமுடியையுடைய வள்ளற் பெருமானது
இறவாமைக்கு ஏதுவாகிய தானத்தை வாழ்த்தினோம். இனி, கிளியை ஒக்கும்
மெல்லிய மொழியினராகிய மகளிர் பயிலும் அதன் கிழக்குத் திசையில்
விளம்புதற்கரிய சிறப்பினையுடைய மகாலிங்கத்தானத்தை இயன்ற அளவு
விளம்புவாம்.

பிரமனும் மாலும் பெரும்போர் புரிதல்

அறுசீரடி யாசிரிய விருத்தம்

     உலக முழுதும் அழியவரும் ஓர் கற்ப முடிவில் கொடிய இருள் வந்து
மூட விரிந்த நீரையுடைய கடல் விரைந்து மேனோக்கி நிவந்து சலப்
பிரளயமாய் உலகை விழுங்கித் தேங்கிக் கிடக்கும் நிலையில் உறக்கத்தை
மெல்ல விடுத்து மீளவும் உலகைப் படைக்க எண்ணி,

     உயர்வுடைய மனோவதி என்னும் தனது நகரில் விளங்குகின்ற பிரமன்
யாண்டும் அலைகள் மறித்து வீச ஒன்றுபட்ட கடல் நீர்ப்பெருக்கு
நிலைபெற்றுள்ள நிகழ்ச்சியைக் கண்டு பெருமை பொருந்திய தொகுதியை
யுடைய கரிய மேகம்போல அவ்விடத்து ஆதிசேடனாகிய பாயலில்
அறிதுயில் கொள்ளும் தனது தந்தையையும் கண்டனன்.

     கருவி-இடி, மின், முழக்கம் முதலிய தொகுதியையுடைய மேகம்.