சோலையில் வண்டினங்கள் மேன்மேல் நெருங்கி மொய்க்கும்
மச்சலிங்கேச வரலாற்றைக் கூறினோம். இனி, பொய்கைகள் நிரம்பிய அதன்
வடமேற்குத் திசையில் குற்றமற்ற சிறப்பினையுடைய அபிராமேச்சரத்தின்
பெருமையைக் கூறுவோம்.

மேற்படி வேறு

     மாவலி என்னும் அசுரர்க்கு அரசன் உலகமெல்லாவற்றையும் காவல்
செய்யும் நாளில் தேவர்களுக்கரசனாகிய இந்திரன் அரசாட்சி மெலிதலின்,
இனியான் என் செய்வேன் என்று அத்தேவர்கோன் தளருங்காலை,

     செவ்விய தளிரை ஒக்கும் மலர்போலும் அடியினையுடைய திருமகளுக்கு
நாயகராகிய திருமால் இந்திரனுக்குப் பின் பிறந்த உபேந்திரனாகக் காசிப
முனிவர்க்கு மைந்தராய்க் குறுகிய வடிவு கொண்டு தோன்றினர். அதிதியின்
பால் தமக்கு முன்னர்த் தோன்றிய தேவர்களுக்கு அரசச் செல்வத்தை உதவ
எண்ணியே.

     விட்டிமைக்கும் ஒளியினையுடைய காஞ்சியின் கண் அபிராமேச்சரச்
சிவலிங்கத்தைத் தாபித்து விதிப்படி வழிபாடு செய்து துதித்தனர் மாவலியை
வெல்லும் வலிமையைப் பெறச் சிலநாள் அங்குத் தங்கி வழிபட்டுக் கங்கை
நீர் ததும்புகின்ற சடைமுடிப் பெருமானார் அருளுதலைச் செய்யப்பெற்று
மீண்டனர்.