சூரியனும் கண்டபோதே விரும்பிப் புணர ஆண்மையையுடைய
சுக்கிரீவன் அப்பொழுது பிறந்தனன். மாட்சிமையுடைய இந்திரன் தான்
பயந்த வாலியைத் தழுவி உச்சி மோந்து உபதேசம் செய்வான்.

     மைந்தனே யாவரும் வழிபட்டுப் பேறு பெற்ற புண்ணியத் தலமாகிய
காஞ்சியை எய்திச் சிவபிரானை வணங்கிக் குரங்குகளுக் கரசாகும்
பேற்றினைப் பெறுக என்றுஇந்திரன் விடுப்ப வாலி குளிர்ந்த நீர் நிலைகள்
சூழ்ந்த காஞ்சியை அடைந்தனன்.

     கொடிய துன்பப் பிறவியைப் போக்கும் சிவகங்கையில் மூழ்கித்
திருவேகம்பத்தை வணங்கிப் பின்பு மயானத் தலத்திற்குக் கிழக்கில்
அறியாமை நீங்கச் சித்தர் பலரும் வழிபடும் பெருமை நிரம்பிய
கடப்பாடமைந்த வாயுலிங்கத்தைக் கண்களிப்புறக் கண்டனன்

     மகளிர் மடலேறுவதற்குரிய விருப்பம் வருவதற்கேதுவான
அழகையுடைய வாலி, இம்மூர்த்தி வாயு வலி பெறுதற்குக் காரணமானவர்
என்று மகிழ்ந்து கடலையொக்கும் பேரன்பினால் அங்குக் கைதொழுது தவம்
புரிந்து இதழ் விரிகின்ற கொன்றைமாலையைச் சூடிய நம்மிடத்தே வரம்
பலவும் பெற்று மேலும் போரில் எதிர்ந்தவர் மிக்க வலியில் பாதியோடும்
குரங்குகளுக்கு அரசனாம் பதவியையும் பெற்றனன்.

     பேற்றினுக்குப் பிறகு வாயுலிங்கத்தைத் தன்னிருப்பிடத்திற்குக்
கொண்டுபோக வலித்தனன். கச்சிப் பதியில் விருப்புடையேமாகலின்