அவன் பெயர்க்கப் பெறானாய் முழுவலிமையையும் வாலில் வைத்துச் சுற்றி
இழுத்து வால் அறுந்து தொலைவில் அரற்றி வீழ்ந்தான்.

     வீழ்ந்தவன், எழுந்து வந்து மென்மல ரடிகள் போற்றித்,
தாழ்ந்தெழுந் தடியேன் இல்லந் தனில்எழுந் தருளிச் சூடும்,
போழ்ந்தவெண் மதியாய் செய்யும் பூசைகொண் டருளாய் என்று,
சூழ்ந்துநின் றிரந்து வேண்டத் தோன்றிமுன் இதனைச் சொன்னேம். 118

     பின்பு வணங்கித் தன் இருக்கைக்கு எழுந்தருள வேண்ட
எதிரெழுந்தருளி இதனைக் கூறினோம்.

     கச்சியின் அகலாத காதலையுடையேம். ஆகலி்ன், எம்மை இவ்விடத்தே
அருச்சனை செய், நின் வாலின் சுவடு பூண்டு செச்சையாகிய வெண்
ணீற்றினை அணிந்த வாலீச்சரனென விளங்கி வீற்றிருந்து மூவுலகும் போற்றி
அருள்பெற இருப்போம் எனஅருளிச் சிவலிங்கத்தில் ஆனேம்.

     அழகிய அணிகளையுடையோய்! அந்நாள் முதலாக அத்தலம்
ஞானத் திருவை நல்கும் வாலீசம் என் றொப்பற்ற பெயரினால் சிறக்கும்,
பஞ்ச தீர்த்தத்தில் மூழ்கி வகுத்துரைத்த இப்பஞ்ச லிங்கத்தினை பெரிதும்
கண்டு துதிக்கப் பெற்றோர் நிச்சயமாக வருத்துகின்ற வினையாலமைந்த
பிறவி நோய் நீங்குவர்.

     இவ்வாறருளி இமய மின்னாகிய அம்மையோடும், மும்மூர்த்திகளோடும்
விளங்கும் அருளொளித் திருவேகம்பப் பெருமான் திருவுருவில்
மறைந்தருளினர் சதாசிவமூர்த்தி. பெருமான் அருளிய திருவேகம்பத்
தலத்தின் பெருமையை எவரே முற்றவும் பேசவல்லவர் ஆவார்; ஒருவரும்
இலர்.

திருவேகம்பப் படலம் முற்றிற்று.

ஆகத் திருவிருத்தம்-2022