பற்பல நாடுகள் சூழ்ந்துற நடுவில் விளங்கும் தொண்டை நாடு, ஆயிரம்
இடம்புரிச் சங்குகளின் நடுவில் இருந்த வலம்புரிச் சங்கொக்கும். பலப்பல
நகர்களைச் சூழக்கொண்டு இடைநின்ற காஞ்சிபுரம், ஆயிரம் வலம்புரி சூழ
நின்ற சலஞ்சலச் சங்கம் ஒக்கும்.

     திருவினையுடைய கச்சி நகர்க்கண் உள்ளபல தலங்களினும் வரிசை
பெற அமைந்த மாளிகைகளைக் கொண்டிடையே விளங்கும் திருவேகம்பம்,
ஆயிரம் சலஞ்சலச் சங்குகளின் இடையே வீற்றிருக்கும் பாஞ்ச சன்னியச்
சங்கினை ஒக்கும். அவ்வாறுயர்ந்த சங்கினுள் விலை வரம்பறுக்க இயலாத
உயர்ந்த முத்தினை ஒப்பவர் ஒப்பற்ற மாவடியில் எழுந்தருளியிருந்து
அருள் செய்கின்ற முக்கண் முதல்வர்.

     கச்சிப்பழம் பெரும்பதி, பலமணிகள் ஒளியை உமிழ்ந்து பரவிய இருளை
ஓட்ட, வட்டமும், பொன்மயமும் உடைய மதில் சூழ்ந்து விளங்க நடுவில்
சதாசிவ மூர்த்தி எழுந்தருளியிருக்கும் இயல்பினால் உயிர் செய்
வினைப்பயன்களை அறிந்து அளித்தற் பொருட்டுத் தரைமிசை வந்த சூரிய
மண்டிலத்தை ஒக்கும்.

     துன்பங்களைத் துடைத்து முப்பத்திரண்டு அறங்களையும்
உமையம்மையே வளர்க்கும் இயல்பினால், என்றும் நிலை கலங்காத
அறங்கட்கெல்லாம் உறைவிடம் காஞ்சியே யாகும். ஆதலின்,
யாவருங்கைக்கொள்ள அற நூலை அருளிய முனிவரரும் அறமாகிய
இலக்கிய முணர்ந்து விதி விலக்காம் இலக்கணத்தை விதித்தனர் போலும்!

     எள்ளினின் றெண்ணெய் எடுப்பது போல இலக்கியத்தினின்
றெடுக்கப்படும் இலக்கணம்.