சோழநாட்டு (தென்கரை)த் தலம்.

     திருச்செங்காட்டங் குடியிலிருந்து 3 கி.மீ. தொலைவிலுள்ளது.

     நன்னிலம், திருப்புகலூர் முதலிய இடங்களிலிருந்தும் பேருந்து
வசதிகள் உள்ளன. மக்கள் வழக்கில் ‘கண்ணபுரம்’ என்றாயிற்று. இராமன்
(இராவணனைக் கொன்ற கொலைப்பாவம், நீங்க) இறைவனை வழிபட்ட தலம்
- இராமனது ஈச்சுரம்.

     இராமர் வந்தபோது நந்தி தடுத்ததாகவும், அம்பாள் கருணை கொண்டு
நந்தியைத் தடுத்து, காட்சி தந்ததாகவும் பின்பு இராமன் தீர்த்தத்தில் நீராடி
வழிபட்டதாகவும் சொல்லப்படுகிறது. இதனால் இராம - நந்தீச்சரம் என்பது
மருவி இராமனதீச்சரம் ஆயிற்று என்பர். இதற்குச் சான்றாக இத்தலத்துக்குரிய
சோமாஸ்கந்த மூர்த்தத்தில் நந்திதேவர் (அம்பாள் கரத்தில்) உள்ளார்.
இப்போது இம்மூர்த்தம், பாதுகாப்பு கருதித் திருப்புகலூர் கோயிலில்
வைக்கப்பட்டுள்ளது.

     இறைவன் - இராமனதீஸ்வரர்.
     இறைவி - சூளிகாம்பாள், சரிவார்குழலி.
     தலமரம் - சண்பகம் (தற்போது மகிழமரம்தான் உள்ளது.)
     தீர்த்தம் - இராமதீர்த்தம் (கோயிலின் எதிரில் உள்ளது.)

     சம்பந்தர் பாடியது.

     கிழக்கு நோக்கிய திருக்கோயில். எதிரில் இராமதீர்த்தம் உள்ளது.
கொடிமரமில்லை. வலப்பால் அம்பாள் சந்நிதியுள்ளது. நின்ற திருக்கோலம் -
தெற்கு நோக்கியது. வெளிச்சுற்றில் நந்தவனம் உள்ளது. விநாயகர்,
சுப்பிரமணியர், கஜலட்சுமி, காலபைரவர், சூரியன் சந்நிதிகள் உள்ளன.

    மூலவர் - பெரிய திருவுருவம். உயரமான பெரிய சுற்றுடைய
ஆவுடையாருடன்கூடிய உயர்ந்த பாணம். தீபாராதனையின்போது
திருமேனியில் சோதியைக் காணலாம். கோஷ்டமூர்த்தங்களாக,
தட்சிணாமூர்த்தி, இலிங்கோற்பவர், பிரம்மா, துர்க்கை ஆகியோர் உள்ளனர்.
எதிரில் சண்டேசுவரர் சந்நிதி. சுவாமி விமானம் வேசர அமைப்புடையது.