2. வளர்ப்புப் படலம்

குனைன் சிற்றூரில் கொடிய வறுமை

மக்காநல் லூரை ஒட்டி மதிப்புறு சிற்றூர் உண்டாம்
அக்காலம் குனைன் என்பார்கள் ஆகாத வறுமைக் கோட்டில்
சிக்கிய தாலே அந்தச் சிற்றூரில் வாழ்ந்து வந்த
மக்களோ நிலைமை மாறி மக்காவை நாடிப் போனார்; 1

சிற்றூர் நலங்களை இழந்தது

வேலையைத் தேடிப் போனார் மெய்வலி உள்ள மக்கள்
ஆலையைத் தேடிப் போனார் அருந்தொழில் கற்ற மக்கள்
சோலையை நாடிப் போனார் தோட்டத்தில் உழைக்கும் மக்கள்
பாலையாய் மாறிச் சிற்றூர் பண்பினை இழந்ததாலே; 2

பலர் உயிரை விட்டனர்

ஆண்களும் பெண்கள் தாமும் அரும்பசிச் சேய்க ளோடு
காண்கனிக் கிழங்கு காயைக் களிப்பூட்டும் பசுந்தழையை
வீண்ஆன தானியத்தின் விதைகளை உணவாய்க் கொண்டார்
ஊண் வேறும் அகப்படாமல் உடல்வற்றி உயிரும் விட்டார்; 3

ஊக்கம் எல்லாம் பாழாயிற்று

கூழுக்கும் வழிஆங் கில்லை குடிநீர்க்கோ பெரிய தொல்லை;
“பாழுக்கே வாழ்வோம்” என்று பகர்ந்தாரும் உயிரை விட்டார்
ஊழுக்குப் பெருமை தந்தார் ஊருளார் எல்லா ருக்கும்
பாழ் ஊக்கம் இருந்த போதும் பயனற்றுப் போன தாலே! 4

உயிரினங்கள் உருவம் மாறின

மாடுகள் ஆடுகள் போல் மாண்புடல் இளைத்துப் போக
ஆடுகள் குறுமுயல் போல் ஆகவும் முயல்கள் எல்லாம்
ஓடும் வெள்ளெலிகள்ஆக உறுஎலி உருவம் மாறித்
தேடும்வெண் புழுப்போல் ஆகத் திகைத்தனர் மக்கள் எல்லாம்; 5