முகம்மது இபுலீசைக் கடிந்து கொண்டார்

சொன்னவனாம் இபுலீசு மக்கள்முன்

தோன்றாமல் சொல்லி ஏய்த்தான்

அன்னவனின் சொல்கேட்டு மயக்கமுற்ற

மக்காமேல் அன்பு கொண்ட

முன்னவராம் முகம்மது முன்வந்த

இபுலீசை முனிந்து நோக்கிச்

“சின்னவனாய் நடக்காதே இபுலீசே!”

எனச்சொன்னார் சினத்தி னாலே! 4

மக்கா மக்கள் மதீனா மக்கள் வருந்தும்படி பேசினர்

பழிக்கஞ்சாப் பாதகனின் உரைகேட்ட

மக்காவின் பாவ மக்கள்

வழிக்கண்ட மதீனாவின் மக்கள்எலாம்

தாம்வருந்த, “மக்கா தன்னை

ஒழிக்கத்தான் வந்தீரோ அன்றிநீங்கள்

விழாக்கண்டே ஓங்கத் தானோ?

விழிக்கத்தான் போகின்றீர்” எனவெகுண்டு

மக்கத்தார் வினவி னாரே! 5

மதீனா மக்கள் அடங்கிப் போயினர்

தவறில்லா தவரிடத்தில் தவறுடையோன்

தன்பேச்சால் தவறாய்க் கேட்க

எவரிவர்கள் ஏதேதோ பேசுகிறார்

எனக்கலங்கி மதினா மக்கள்

“நவையில்லார் நாம்வருந்தப் பேசுகின்றார்

எனக்கூறி நடுக்கம் கொண்டே

அவரவர்கள் தம்மிடத்தை அப்போதே

போய்ச்சேர்ந்தார் அடக்கத்தோடே; 6