ஒற்றர்களே! என்ன செய்தி கூறுங்கள்?

தோழர் எல்லாம் உடன்சூழத் தோன்றல் பெருமான் வீற்றிருக்க
வாழும் பகைவர் காபிர்கள் வளர்க்கும் பகையை உடன்அறிந்து
தாழ்ந்து சொல்ல வந்தார்கள் தகுதிமிகுந்த ஒற்றர்கள்
ஏழைக்கிரங்கும் இனிய நபி! “என்னசெய்தி?” எனக் கேட்டார்; 40

அபூசகுல் படைதிரட்டி வந்துள்ளான்

“ஐய! சீபுல் பகுறென்னும் அழகுச் சிற்றூர் தனில் இன்று
வெய்ய மனத்தான் அபூசகுல்தன் வீரர் குதிரை முந்நூறில்
பையப் போரைச் செய்யத்தான் பகைமேற் கொண்டு வந்துள்ளான்
உய்ய உரைத்தோம் எனக்கூறி ஒற்றர் நீங்கிச் சென்றவுடன்; 41

தந்தையே! உடன் போருக்குப் புறப்படுக

வெற்றி ஒன்றே காணுகிற வீரர் அமுசா என்னும்தம்
சிற்றப் பாவை உடன்அழைத்துச் “சிறிய தந்தாய்! இப்போதே
குற்ற மனத்தான் அபூசகுலின் கொடிய மனத்தைப் பொடியாக்க
உற்ற முப்ப(த்)தருங் குதிரை உறுவீரருடன் செல்லுங்கள்;” 42

அபூசகுல் கொக்கரித்தான்

என்ற மன்னர் பணிஏற்ற இனியர் அமுசா புயலினையும்
வென்று வருதல் போலெழுந்து விரைந்தார் சீபுல் பகுறாரே!
அன்றங் கிருந்த அபூசகுலும் அதனை அறிந்து, போர் செய்து
கொன்றே ஒழிப்பேன்” எனக் கூறிக் கோழி போலக் கொக்கரித்தான்; 43

மசுதி என்பவன் தூது வந்தான்

அங்கும் இங்கும் நரிபோல அலைந்து வஞ்சம் புரிமனத்தான்
வெங்கண் மசுதி என்பானும் வீரன் போலப் பகைவரிடம்
தங்கி இருந்தான் இப்போரைத் தட்டிக் கழிக்க முற்பட்டே
எங்கும் நுழையும் இயல்பதனால் இனிய படையோர் முன்வந்தான். 44