மக்கா வணிகர் சாம் நகர் அடைந்தார்கள்

“செல்வம் மிக்க மக்காவின் சில்லோர் வணிகப் பெருமக்கள்
நல்வான் உடுக்கள் போல்மின்னும் நவைஇல் லாப்பொன் மணியோடும்
வெல்வான் வணிகம் புரிந்துவர விரும்பி நகர் “சாம்” அடைந்தார்கள்
பல்வான் புகழ்கொள் பொருளீட்டிப் பகுத்தும் வகுத்தும் தொகுத்துமதை; 5

மக்காவுக்குத் திரும்புகிறார்கள்

சுமையாய் விலங்கின் முதுகேற்றிச் சுடர்ப்பொன் மக்கா வருகின்றார்
அமையாத் தீய அபாசுபியான் அவனோ டுற்ற நாற்பதுபேர்
நமையார் மிஞ்ச இருக்கின்றார் நாட்டில் செல்வர்? எனப் பேசித்
தமையே தருக்கி வருகின்றார் தகையீர்!” என்றார் அவ்வொற்றர்; 6

போருக்குப் புறப்படுங்கள்

நம்பற் குரியார் தம்மிடத்தில் நவின்ற மொழியைக் கேட்டவுடன்
செம்பொன் முகத்தார் முகம்மதுவும் சிறந்த தங்கள் தோழர்களைத்
தம்பால் அழைத்துத் “தகவுடையீர்! தானை நடத்திப் புறப்படுவீர்!
அம்பால் ஈட்டி கத்தியினால் அவரை மடக்க” என உரைத்தே; 7

பொறுப்புகளை ஒப்படைத்தார்

சேயார் அபாலு பானாவை “செங்கோல் ஆட்சி புரி”கென்றார்;
நேய உம்மி மகதூமை, “நிலைத்த தொழுகை செய்”கென்றார்;
ஆய பணிகள் எவைஎவையோ அவற்றை உரியார்க்கு ஒதுக்கிட்டார்
தூய இறைவன் துணை வேண்டித் தொழுகை நடத்தும் அரியோரே 8

முந்நூற்றுப் பதினான்கு பேர் திரண்டனர்

மூன்று நூறும் பதினான்கும் முழுமெய் வலிமைப் படைவீரர்
தோன்றல் முன்னே அணிவகுத்தார் தொடங்கும் போர்க்குப் பொருந்திடுமெய்
ஊன்று கத்தி வேல் ஈட்டி உடைவாள் வில் அம்பு உறுநண்பர்
போன்று மெய்யைக் காக்கின்ற புகழ்க் கேடயமும் அணிந்தார்கள். 9