அம்மா நானும் ஆடுமேய்க்கப் போவேன்

“அண்ணார்கள் போவதுபோல் அம்மா யான்

கால்நடைமேல் அன்பு காட்டித்

தண்ணார்பைங் கானகமே நாள்தோறும்

செலவேண்டும் தயக்க மின்றிப்

பண்ணார்செங் கவின் இதழால் உடன்பட்டுப்

பகர்கென்று பன்னிப் பன்னி

விண்ணார்ந்த குரிசிலரும் விழைந்தமனக்

கருத்ததனை விளம்பி னாரே; 4

கொடுமையான காடாயிற்றே

கள்ளிருக்கும் மொழிகேட்ட கனிமுகத்துத்

தாய்அலிமா கவலை யோடும்

“முள்ளிருக்கும் கொடும் புதர்கள் முளைத்திருக்கும்

புற்றுக்குள் முகத்தைக் காட்டிப்

பல்லிருக்கும் நச்சுடைய பாம்பிருக்கும்

மரக்குகையில் பதுங்கி வாழ்ந்தே

உள்ளிருக்கும் ஆள்விழுங்கும் மலைப் பாம்பும்

உடனிருக்கும் ஓநாய் ஆங்கே; 5

இருந்தாலும் அண்ணன்மார்களோடு செல்

இருந்தாலும் குழந்தைகளே! இளையவனின்

விருப்பத்தை எண்ணி அன்பன்

வருந்தாமல் அழைத்தேகி வாடாமல் நலம்தந்து

கொடுந்துன்பம் வாய்க்கும் காட்டில்

பொருந்தாமல் சோலைகளும் சுடர்பொய்கை

வளங்களையும் போய்முன் காட்டி

வருந்தாம ரைமலர்போல் வரவேண்டும்”

எனத்தாயும் பரிந்து சொன்னார்; 6