மைந்தர்களும் அன்னை சொல்லைப் போற்றினர்

அன்னையவர் சொன்னதனை அருமறையாய்

உளத்தெண்ணி அரிய மைந்தர்

மன்னியசீர் பெருமானை முகம்மதுவாம்

கோமானை மலர்போல் ஏந்திப்

பன்னருஞ்சீர் ஆடுகளைப் பக்குவமாய்

மேய்த்ததன்பின் பரிவு காட்டும்

அன்னையரின் முன்வந்தார் அன்றாடம்

அண்ணலவர் அருமை கண்டே! 7

வளம் பெருகி வாழ்ந்தார்கள்

ஆடுகளும் அளவின்றிப் பெருகினவே

அலிமாவின் அரிய செல்வம்

பீடுயர்ந்து பெருகினவே முகம்மதுவின்

பெருமைமிகு பாதம் பட்ட

காடுயர்ந்து செறிந்ததுவே கனிமலிந்து

பொலிந்தனவே கரைகொள் கால்வாய்

மேடுயர்ந்து நீருயர்ந்து பெருகுநலப்

பயிருயர்ந்து மேன்மை கொண்டார்; 8

ஆயர்குலச் சிறுவரின் பெருமை

தீயமனம் இல்லாத சிறப்புடைய

குலத்தவராய்ச் சிறந்து வாழும்

ஆயர்குலச் சிறுவரொடும் அருள்மகனார்

அன்புபொழிந் தாடிப் பாடித்

தோயமதுப் பாலருந்திச் சுவையுடைய

கனியருந்தித் தொடர்ந்து நெஞ்சில்

நேயமுடன் வளர்ந்திங்கு நீக்கமற

விளையாடும் நிறைநன் னாளில்; 9