6. முறைசீக்குப் போர்ப் படலம்

முசுதலிக்கு குலத்தினர் நிலை

நிறையும் பொறையும் அற்றவர்கள் நெருங்கி வாழும் நிலைஉடைய
முறைசீக் கென்னும் ஒரு நகரில் முசுதலிக்குக் குலத்தார்கள்
கறைவாய்ப் பட்ட நெஞ்சினராய்க் கரவும் கொலையும் கைதேர்ந்து
மறையை இகழ்ந்து முகம்மதுவின் மதிப்பை இகழ்ந்து வாழ்ந்தார்கள். 1

இசுலாமியரைக் கொன்றிடுவார்

ஒன்றே தெய்வம் என்பவர்கள் ஒட்டி வந்தால் அன்னவரைக்
கொன்றே விடுவோம் எனத்துடிக்கும் கொள்கை கொண்ட கொடியார்கள்
நன்றே அறியா வினைசெய்யும் நவைஉள் ளத்தார் அவரோடு
சென்றே பேசித் திரும்பிவரும் தீன்நல் லாரோ எவருமிலர். 2

முகம்மது தாக்க முற்பட்டார்

கொள்ளை இனத்தார் இன்னவரின் கொடுமை அறிந்த இறைதூதர்
எல்லை இல்லாச் சினமேவி எதிர்த்துத் தாக்கப் புறப்பட்டார்
முள்ளை முள்ளால் எடுப்பதுவே முறையாம் என்னும் உரைநெறியே
செல்லும் எண்ணம் மிக்கவராய்ச் செம்மல் எதிர்க்க முற்பட்டார்; 3

மனைவியருள் எவரை அழைத்துப் போவது?

பெருமை மிக்கார் பெண்களெனப் பேணும் நபிகள் நாயகமோ
அருமை கொண்ட துணைவியருள் ஆரை யேனும் ஒருவரையே
வரும்அப் போரின் முனைகாணும் வகையில் தம்மோ(டு) அழைத்தேக
விரும்பினார்கள் அதற்கேற்ற வினையை உடன்மேற் கொண்டாரே! 4

ஆயிசா அன்னை பெயர் வந்தது

அன்பால் கலந்த துணைவியர்தம் அரும்பேர் எழுதி வைத்தவற்றுள்
நன்பால் அன்ன தூயமன நபியார் ஒன்றைத் தேர்ந்தெடுத்தார்
பண்பால் சிறந்த மனைவியருள் பனிவாய் மொழியார் ஆயிசாநற்
பெண்பால் இறைவன் அருள்கனியப் பேரும் அதுவே ஆனதுவே! 5