அபாலு பானாவைத் தூதாக அனுப்பி வைப்பீர்

பழிக்கவே இடமில்லாத பண்புள்ள தோன்ற லாரே!
அழிக்கவே வந்தீர் எம்மை அறிக்கையை முன்னர்க் கேட்பீர்
விழிக்கனல் மாறி உங்கள் வீரர்நல் அபாலு பானா
தொழிற்பட அனுப்பி வைப்பீர் தூதராய்” என்று சொன்னார்; 5

பகைவர் கருத்துக்கும் மதிப்பளித்தார்

பகைவரின் உரையைக் கூடப் பண்புடன் ஏற்றுக் கொண்ட
நகைமுகச் செம்மல் தங்கள் நல்அபா லுபானா தம்மை
வகைபெறப் பேசித் தீர்த்து வருகவே” என்று கூறிப்
புகைமனப் பனீகுறைலா பொய்யர்பால் அனுப்பி வைத்தார். 6

பெண்கள் பேசினார்

அச்சமில் லாமல் வீரர் அபாலுபா னாவும் சென்றார்
உச்சிமேல் கையை வைத்தும் உதறிய கைகா லோடும்
பச்சிளங் குழந்தை யோடும் பதறிய பெண்கள் தோன்றி
அச்சமே கொண்டா ராக அவர்முன்னர்ப் பேச லுற்றார்; 7

எம்மைக் காப்பீர் ஐயா!

வாய்மையை இகழ்ந்த தாலே வாழ்வினை இழந்தோம் ஐயா!
தூய்மையைத் துணையாய்க் கொண்ட தோன்றலைப் பழித்தோம் ஐயா
தீமையைத் தேடிச் சென்று தீவினை புரிந்தோம் ஐயா!
ஊமையாய் வாழ்ந்த எம்மை ஒதுக்காமல் காப்பீர் ஐயா! 8

ஏமாந்து விட்டோம் ஐயா!

நன்மையை இகழ்ந்த தாலே நானிலத் திழிந்தோம் ஐயா!
புன்மையை நாடிச் சென்றே புகழினைத் துறந்தோம் ஐயா!
வன்மையை நம்பி நாங்கள் வழிமாறிப் போனோம் ஐயா!
இன்மையை உண்மை என்றே ஏமாந்தோம் காப்பீர் ஐயா! 9

கலிமா ஓதாவிட்டால் முகம்மது கொன்று விடுவார்

என்பன புலம்பிக் கூறி எதிர்நின்ற மக்கள் தம்பால்
வன்பனை அன்ன தோளார் வலியர்அபாலு பானா,
அன்பினை மதித்து நீங்கள் அகம்மது நெறியில் நின்று
பண்புடன் கலிமா ஓதிப் பணிவதே சிறந்த தாகும். 10