செயினபுவுக்குத் தூது அனுப்பினார்

உடன்பாடில் லாதார் வாழ்க்கை பாம்பொடும் உறைவ தன்றோ?
இடம் காலம் எல்லாம் தேர்ந்தே இருவரும் பிரிந்து விட்டார்
நடப்பவை எல்லாம் அந்த நல்லவன் இறையால் என்னும்
கடனறி முகம்மதண்ணல் கருத்தொடும் தூது போக்கி; 54

முகம்மது மணக்க விரும்புகின்றார்

“தூதுவ! நீபோய் தையல் தூய் செயினபுவைப் பார்த்து
மாதவ மணியாம் உம்மை மகம்மது மணக்க எண்ணும்
காதலை உரைக்க” என்றார்; கருத்தினைக் கேட்ட அந்தத்
தூதரும் விரைந்து சென்று தோகைமுன் அதனைச் சொன்னார்; 55

செபுறயீல் வந்தார்

இறையவன் விருப்ப மானால் இயலலாம் என்று சொன்ன
நறைமலர்க் கூந்த லாரின் நல்லசீர் கருத்தை மீண்டும்
முறையுடன் வந்து சொன்னார்; முகம்மது நபிகள் கேட்டு
நிறைவுடன் இருந்த போதே நேர்செபு றயீலும் வந்தார்; 56

விண்ணகத்தில் தங்கள் திருமணம் நடந்து விட்டது

செம்மலே! நுமக்கும் நல்லார் செயினபு தமக்கும் வானில்
நம்மவர் சூழ மன்றல் நடந்தது சொன்னேன்” என்றார்
செம்மையார் கூறி வானம் சென்றதும் அண்ணலாரும்
இம்மென விரைந்து சென்றே எழில்மணி யாரைப் பார்த்தார்; 57

செயினபு திருமணத்துக்கு இசைந்தார்

ஆணையே இட்டான் அந்த ஆண்டவன் என்ற போதே
மானையே நிகர்த்த அன்பு மங்கையாம் செயினபூவும்
தேனையே உண்டார் போலத் தெளிந்தநற் கருத்தை ஏந்தித்
“தீனையே வளர்க்க வந்தேன் திருமணம் நடக்கும்” என்றார்; 58