வீரர்கள் கதையைப் போற்றும்,
       வெற்றியை வியந்து வாழ்த்தும்
தீரர்கள் முன்னே வாழ்ந்தோர்
       திறமையின் சிறப்பைப் பேசி
சூரர்கள் பலபேர் சொன்ன
       சுதந்தர உரைகள் சொல்லி
ஆரொரு மனிதற் கேனும்
       ஆண்மையே அழகாம் என்பான்.       11

‘காதலே தெய்வம்‘ என்பான்;
       ‘கடவுளே காதல்‘ என்பான்;
பூதல வாழ்வு முற்றும்
       காதலில் பொருந்தும் என்பான்;
ஆதலால் காதல் என்னும்
       அப்பொருள் அடைந்து இலாதார்
சாதலே மேலாம் என்று
       சாற்றுவான் சலிப்பில் லாமல்.       12

பெண்களை அழகுத் ‘தெய்வப்
       பிறிதொரு பிரதி‘ என்பான்;
பண்கொளப் பாடி ஆடிப்
       பல்கலைப் பயிற்சியோடும்
கண்கொளும் உடைகள் பூண்டு
       களிதரும் காட்சி யாக
எண்கொளும் இனிமைக்கு எல்லாம்
       இருப்பிட மாக எண்ணும்.       13

பற்பல வழியில் நாட்டின்
       பொதுநலம் பரிந்து பேசிச்
சொற்பொழி வாற்ற லுள்ளான்;
       சுதந்தர ஆசை யூட்டும்
அற்புதத் திறமை யோடும்
       அறிவுடன் அமைவ தான
கற்பனை மிகுந்த நல்ல
       கதைகளும் காட்டிச் சொல்வான்.       14