(இ-ள்.) ஆங்கு - அம்முனிவரிடத்தே, அபயவுருசியுடன் அபயமதியும் - --, தாங்கலர்கள் சென்று -(நிகழ்ந்த வரலாறு அனைத்தையும் தூதுவர்மூலம் அறிந்து துன்பத்தைத்) தாங்க முடியாதவர்களாய்ச் சென்று,  தவ அரசன் அருளால் - தவத்தோர்கட்குத் தலைவராகிய சுதத்தாசார்யரை வணங்கி அவர் கூறியருளிய அறவுரையால்,  நீங்கியபவங்களை - (தாங்கள் துய்த்தலாற்) கழிந்த பிறவிகளை, ஆங்கு - அப்பொழுது (தமக்கெய்திய பழம்பிறப்புணர்வால்), நினைந்தனர் உணர்ந்தார் - நினைந்து  உணர்ந்தனர் (அதனால்), அவர்கள்  - அவ்விருவரும், உறும் கவலை-உற்ற துன்பத்தை,  யாவர் பிறர் அறிவார் - (இறைவனே யன்றி) அறியவல்லவர் வேறு யாவருளர்? (எவருமில்லை): (எ-று.)