“பல்லிருங் கூந்தன் மகளி
 ரொல்லா ¹முயக்கிடைக் குழைகவென் றாரே.”

(புறம்-73)

என்பது, காமம்பற்றிய பெருமிதம். பிறவும் வருவன உளவேற் கொள்க. இது தன்கட்டோன்றிய பொருள்பற்றி வரும். என்னை? கல்வியும் தறுகண்மையும் ²இசைமையும் வேட்கையுங் கொடைத் தொழிலுந் தன்கண்ணவாகலின்.

(9)

[வெகுளிச்சுவை இத்துணையது எனல்]

இஃது, ஏழாம் எண்ணு முறைமைக்கண் நின்ற வெகுளி உணர்த்துதல் நுதலிற்று.

இ-ள் : உறுப்பறையென்பது, கை குறைத்தலும் கண் குறைத்தலும் முதலாயின; குடிகோளென்பது, தாரமுஞ் சுற்றமுங் குடிப்பிறப்பும் முதலாயவற்றுக்கட் கேடு சூழ்தல்; அலையென்பது, கோல்கொண்டலைத்தன் முதலாயின; கொலை யென்பது, அறிவும் புகழும் முதலாயினவற்றைக் கொன்றுரைத்தல்: இவை நான்கும் பொருளாக வெகுளி பிறக்கும் என்றவாறு.

‘வெறுப்பின்’ என்றதனான் ஊடற்கண்தோன்றும் வெகுளி முதலாயினவுங் கொள்க.

³”முறஞ்செவி மறைப்பாய்பு முரண்செய்த புலிசெற்று”

(கலி-52)

என்பது, உறுப்பறையான் வந்த வெகுளி.

1. முயக்கிடைக்குழைகவென்றமையின் முயக்கிடைக்குழையாமை வீரம் என்க.

2. இசைமையும் வேட்கையும் என்பது இசைவேட்கையும் எனவும் பாடம். சூத்திரக்கருத்திற்கது பொருத்தம். உரைகாரர் காமமுங் கூறலின் அங்ஙனமுமிருக்கலாம். அங்ஙனேல் வேட்கை பின்வருதல் நலம்.

3. முறஞ்செவி...புலிசெற்று--முறம்போலும் செவியாகிய மறைப்பு இடமாக வந்து பாய்ந்து மாறுபாட்டைச் செய்த புலியை வெகுண்டு எனவே புலிபாய்ந்து தன் உறுப்பைக் கடித்தலால் வெகுடலின் உறுப்பறையான் வந்த வெகுளியாயிற்று.