கணஞ் செய்யுளியலுட் கூறினான். அவ் ¹விரண்டற்கும் பொதுவாகிய மரபு ஈண்டுக் கூறினமையின் இது செய்யுளியலோடு இயைபு உடைத்தாயிற்று.

மற்று, ²வழக்கிலக்கணஞ் செய்யுட்கும் பொதுவாகலின் இங்ஙனம் இரண்³டற்கும் பொதுவாகிய மரபினையுஞ் செய்யுளியலின்முன் வைக்கவெனின்,--அவ்வாறு வழக்குஞ் செய்யுளுமென்று இரண்டுமல்லாத ⁴நூலிற்கும் ஈண்டு மரபு கூறினமையின் இது செய்யுளியலின்பின் வைக்கப்பட்டது.

இவ்வோத்தின் முதற்சூத்திரம் என்னுதலிற்றோவெனின்,--எல்லாப் பொருளின்கண்ணும் இளமைக்குணம்பற்றி நிகழுஞ் சொல் இவையென்று வரையறுத்துக் கூறுகின்றது.

இ--ள் : மாற்றருஞ் சிறப்பின் மரபியல் கிளப்பின்--விலக்கருஞ் சிறப்பிற்றாகிய மரபிலக்கணங் கூறின்; பார்ப்பும் பறழும் குட்டியும் குருளையும் கன்றும் பிள்ளையும் மகவும் மறியும் என்றொன்பதுங் குழவியொடு இளமைப்பெயர்--குழவியோடு இவையொன்பதும் இளமைப்பெயர் என்றவாறு.

மேலன எட்டுங் குழவியுமென இளமைப்பெயர் ஒன்பதாயின. குழவியோடொன்பதென்னாது, ‘ஒன்பதுங் குழவியோடு’ என மயங்கக் கூறியவதனாற் போத்தென்பதும் இளமைப்பெயரெனவும் பிறவும் வருவன உளவாயினுங் கொள்ளப்படும். இவற்றையெல்லாம் மேல் வரையறுத்து இன்ன பொருட்கு இன்ன பெயர் உரித்தென்பது ⁵சொல்லும்.

1. இரண்டு--வழக்கும் செய்யுளும்.

2. வழக்கு--அகத்திணைவழக்குப் புறத்திணை வழக்கு முதலியன. அவை செய்யுளியற்கு முற்கூறப்பட்ட ஏழியலானும் கூறப்படுவன.

3. இரண்டற்கும்--வழக்குஞ் செய்யுளுமாகிய இரண்டற்கும்.

4. நூல் என்றது--இலக்கண நூலினை. அதன் மரபென்றது அதன் மரபாகவந்த பகுப்பும் அது செய்யுமுறையு முதலியவற்றை.

5. சொல்லும்--செய்யுமென்னுமுற்று ஆசிரியன் சொல்லும் என்றபடி.