ஆசிரியர் பட்டயப் பயிற்சியின் பாடத்திட்டம்

தமிழ் இணையக் கல்விக்கழகம், அயல்நாடுகளில் தமிழ்மொழி கற்பிக்க விழைபவர்களுக்குப் பயனளிக்கும் வகையில் ஆசிரியர் பட்டயப் பயிற்சி வழங்க முன்வந்துள்ளது. இப்பயிற்சி ஓராண்டுக்குரியது. இப்பயிற்சிக்காகப் பாடத்திட்டம் உருவாக்கப்பட்டுள்ளது.

தமிழை இரண்டாம் மொழியாகக் கற்பிக்கும் ஆசிரியர்களுக்குத் தமிழின் இயல்பு, அதன் இலக்கிய, இலக்கண வளம், கற்பித்தல் நுட்பங்கள் முதலான இன்றியமையாத கூறுகள் இப்பாடத்திட்டத்தில் இடம்பெற்றுள்ளன.

ஆசிரியர் பட்டயப் பயிற்சி - பாடத்திட்டம்

ஆசிரியர் பட்டயப் பயிற்சியானது ஓராண்டு நடைபெறும். இரண்டு பருவங்களாக அமையும். முதல் பருவத்தேர்வில் தாள் – 1 & 2 இடம்பெறும். இரண்டாம் பருவத்தேர்வில் தாள் – 3 & 4 இடம்பெறும்.

தமிழ் கற்பிக்க விரும்பும் ஆசிரியர்கள், தமிழின் இன்றியமையாத கூறுகளை அறிந்துகொண்டால் சிறப்பாகக் கற்பிக்கலாம் என்ற அடிப்படையில், இந்த முதல் தாளுக்குரிய பாடப்பொருள் வடிவமைக்கப்பட்டுள்ளது. இந்தத் தாள் 5 அலகுகளாகப் பிரிக்கப்பட்டுள்ளது. ஒவ்வோர் அலகிலும் தமிழ் கற்பித்தலின் அடிப்படை நிலையில் அறிந்துகொள்ள வேண்டிய உட்கூறுகள் கொடுக்கப்பட்டுள்ளன. இதனால் தமிழாசிரியர்கள் திறம்பட கற்பிக்க இயலும்.

மொழியை முறையாகக் கற்பதற்கு இலக்கணம் பயன்படுகிறது. மொழியைத் திருத்தமாகப் பேசவும் எழுதவும் இலக்கணம் உதவுகிறது. ஒரு மொழியின் இலக்கணம் அம்மொழிக்கு அரணாக விளங்குகிறது. தமிழ் கற்பிக்கும் ஆசிரியர் அவற்றைப் பற்றிய பொதுவான அறிவு பெற்றிருக்க வேண்டும் என எதிர்ப்பார்க்கப்படுகிறது. எனவே, ஆசிரியர் பட்டயப் படிப்புக்கான இரண்டாவது தாள் “அடிப்படைத் தமிழ் இலக்கணம்” என்று அமைகிறது.

தம் கருத்தைப் பிறருக்கு உணர்த்த உதவுவது மொழியாகும். மொழிவழியே உள்ளத்தில் எழும் அழகியல் உணர்வுகளை வெளிப்படுத்த முடியும். அவை கவிதை, கதை, நாடகம், கட்டுரை மற்றும் பல இலக்கிய வடிவங்களைக் கொண்டு அமைகிறது. இவற்றைப் படைக்கும் படைப்பாளர்கள், மொழியில் வல்லமை பெற்றவர்களாவர். இவர்கள் மொழியின் அடிப்படைத்திறன்களில் சிறந்து விளங்குவதோடு கற்பனை ஆற்றலைப் பெற்றிருப்பர். மேலும், சிறந்த எழுத்தாளர், பேச்சாளர், கவிஞர், நாடகவியலாளர் என இவர்கள் பன்முகத் திறன் கொண்டு விளங்குவர். இத்தகைய ஆற்றல் பெற்றவர்தான் படைப்பாற்றல் திறன் மிக்கவராவர். படைப்பாற்றல் திறன் மொழியின் உயர்நிலைத் திறனாக கருதப்படும். எனவே, படைப்பாற்றல் திறன் மிக்க மாணவ சமுதாயத்தை உருவாக்கும் ஆசிரியர்கள், தாமும் படைப்புத்திறன் மிக்கவர்களாக இருக்கவேண்டும். என்ற நோக்கத்திற்காக இத்தாளானது உருவாக்கப்பட்டுள்ளது.

ஆசிரியர் கல்வி பட்டயப் பயிற்சியில் இன்றியமையாத பகுதி பாடம் கற்பித்தலாகும். கற்றல், கற்பித்தல் என்பது வாழ்நாள் முழுவதும் நடைபெறும் ஒரு தொடர் செயல்பாடாகும். எனவே, பாடம் கற்பிக்கும் ஆசிரியர், பட்டறிவு மிக்கவராகவும் சிறந்த கற்பித்தல் உத்திகளைக் கையாள்பவராகவும் இருக்கவேண்டும். முன்தயாரிப்பில்லாமல் வகுப்பிற்குள் நுழையும் ஆசிரியர், அன்றைய வகுப்பறைச் சூழலை வெற்றிடமாக்கிவிடுவார். எனவே, கற்பித்தலுக்கு முன் நன்கு திட்டமிடவேண்டும். உற்றுநோக்குதல், கற்பித்தல் குறிப்புகள் தயாரித்தல், நுண்ணிலைக் கற்பித்தல் பயிற்சி, பாடம்கற்பிப்புத் திட்டம் எழுதுதல், துணைக்கருவிகள் உருவாக்குதல், கற்பித்தலில் புதுமைகளைப் புகுத்துதல், பாடநூல்களை ஆய்வு செய்தல் மற்றும் மதிப்பிடுதல் போன்ற பல்வேறு செயல்பாடுகளை மேற்கொள்ளவேண்டும். அயலகச் சூழலில் தமிழ் கற்பிக்கும் ஆசிரியர், தமிழின் இலக்கண இலக்கிய பனுவல்களைப் (Text) படிக்கவேண்டும். சிறந்த படைப்பாளர்களின் படைப்புகளைப் படித்துக் கற்பிக்க வேண்டும். தேமதுர தமிழோசை உலகமெல்லாம் பரவிட செய்ய வேண்டும். இவ்வாறு செய்முறைப் பயிற்சியை மேற்கொண்டால் கற்றல் கற்பித்தல் சிறப்பாக அமையும்.