Navaneetha Paattiel

(உரை II). எ - று. அளவில்லாமல் இருக்கப்பட்ட அறுபத்து நான்கு கலைகளையும் ஆராய்ந்து, இயலிசை நாடகமென்று முத்தமிழையும் உரைத்த குறுமுனியாகிய அகத்திய முனிவர் திருவாக்கில் உண்டாக்கப்பட்ட ³பருணர்பாட்டியல் என்னும் பரப்பினை விரிந்த நூலுணர் மேதினியோர்க்குப் பயன்படப் பாட்டியலென்று தொகுத்துரைத்தான் நவநீத நாட்டு அரிபத்தனான சிறப்புப் பெயருடைய ஆசீர்வாத முள்ளான் நவநீத நடனென்னும் இயற்பெயரையுடையோன் எ - று.

(கு - ரை.). பருணர்பாட்டியல் என்ற ஒன்றை அகத்திய முனிவர் செய்ததற்கு இவ்வுரையன்றி வேறு ஆதாரம் இதுவரையிலும் தெரியவில்லை. இந்நூலாசிரியர் அரிபத்தரென்பது இவ்வுரையால் மட்டுமன்றித் தற்சிறப்புப்பாயிரத்தில் திருமால் வணக்கம் கூறப்படுவதாலும், நவநீத நடன் என்ற பெயராலும் புலனாகும். நாட்டிய வேதத்தவன் - நிலைபெறச்செய்த மறையவன். நவநீதநடன் என்பது கண்ணபிரானுக்கு அமைந்த பெயர்களில் ஒன்று ; நவநீதம்-வெண்ணெய் ; வெண்ணெய்க்காக நடஞ்செய்தவன்; ‘பாவையர் மனைதொறும் வெண்ணெய்க் காடினான்’; ‘நறு வெண்ணெய் ஆயர் மங்கைய ரிடவிட வமுதுசெய் தாடிய திருக்கூத்தும் ’ (வி. பா. இராச. 119. நச்சுப். 1.). என்பர் - என்று சொல்லுவர். ஏ : அசை. ‘நடத்தினனே’ என்ற பாடப்படி, ‘நவநீதன் தொகுத்துப் பயன்படநடத்தினன்’ எனக் கூட்டுக ; நடத்தினன் நிமழ்த்தினன்; “யானா நடாத்துகின் றேனென் றெனக்கே நகைதருமால்” (யா. கா. தற்சிறப்பு. 2.). இவ்வுரை கொள்ளுமிடத்து, ‘ நாட்டிய வேதத்தவன் ’ என்பதற்கு, ‘நாட்டிய சம்பந்தமான வேதத்தையுடையவன்’ என்று பொருள் கொள்ளுக. ‘நாட்டிய வேதா’ என்ற தொடர் வடமொழியில் அந்தணர் முதலிய பல சாதியினர்க்கும் வழங்கப்பெறும், (2)

(பி - ம்.) ¹ ‘யாகக்’ ² ‘நீத நடனென்பனே’, ‘நீத னடத்தினனே’, ‘நாட்டு நவநீதனே’ ³‘பருணப் பாட்டியல்’