Primary tabs
திணைமாலை நூற்றைம்பது
துறை, சொற்றொடர் விளக்கம்.
[எண் - செய்யுளெண்]
மதியுடம்படுத்தல்
தோழியின் அறிவுப் போக்கினைத்
தலைவன் தனது விருப்பினை நிறைவேற்றற்குத் தகுதியாக மாற்றல். இது பாங்கியிற்
கூட்டத்தின் பாற்படும்.
பகற்குறி
பகற்காலத்தே தலைவனும் தலைவியும்
தம்முள் எதிர்ப்பட்டுக் கூடும் இடம். இது தினைப்புனத்தின் அருகேயுள்ள பூஞ்சோலைக் கண்ணதாகும். இப் புணர்ச்சி களவின்கண் பாங்கியிற்
கூட்டத்தின் பாலதாம்.
இரவுக் குறி
தலைவனும் தலைவியும் களவுப் புணர்ச்சியில் இராக்காலத்தே தம்முள் எதிர்ப்பட்டுக் கூடும் இடம். இது தலைவியின் இல்லினையடுத்த தோப்பின் கண்ணதாம்.
மடன்மா மேலூருதல்
தலைவியைப் பெற முடியாது போயின விடத்துத் தலைவன் மேற்கொள்ளும் வினையாம். அவ்வினை இவ்வைந்திணைக்கும் அடங்காப் பெருந்திணையின் பாற்படும். அது பனை மடலாகிய கருக்கினாலே குதிரை யொன்று செய்து, அதன் கண் தலைவன் மெய்யெல்லாம் நீறு பூசி எலும்பு மாலை யணிந்து தலைவியின் வடிவ மெழுதிய ஓவியத்தைக் கையிற் பிடித்துக்கொண்டு அமர்ந்திருக்க, தலைவனைச் சார்ந்தோர் அக்குதிரையினைச்சிறிய சகட மொன்றினிற் சேர்த்துத் தலைவியின் வீதி வழியே இழுத்துச் செல்வதாம். அப்பொழுது தலைவியின் மேலுள்ள காதலால் தலைவன் பனைமடலால் உண்டாம் நோயினைப் பொருட்படுத்தாது செல்வன். அதனைக் கண்ட தலைவியின் உற்றார் வியந்து தலைமகளை அவனுக்கு மணம் புரிவிப்பர்.
கையுறைமறை
தலைவன் தலைவியின் கையிற் சேர்க்கும் பரிசாகக்கொண்டுவந்த பொருளை
யாதாமொன்று கூறித் தோழி முதலியோர் மறுத்தல்
தலைவியைப் பேதைமை யூட்டியது
தலைவியினிடத்திற் பேதைமைக்குணம்
பெருகியுள்ளதாகத் தோழி தலைவனுக்குச் சொல்லியது.
பசப்பு
தலைவனைப் பிரிந்த தலைவியர் கொள்ளும் மேனி் மாற்றம்."அறத்தொடு நிலை--உண்மையாகிய அறத்தினை மேற்கொண்டு செவிலி முதலியவர்களோடு சேர்ந்து நிற்றல்.
முல்லையாவது
தலைவி தலைவன் வருகையை எதிர்பார்த்துக் கற்பாற்றியிருக்கும் ஒழுக்கமாம். அவ்வொழுக்கத்திற்குக்காரணமாயவைகளும் ஈண்டுக் கொள்ளப்படும்.
புளிவேட்கைத்து
புளியம்பழத்தின்கண்
மக்கள் கொள்ளும் விருப்பம்போல் மேலும் மேலும் விரும்புந் தன்மையது.
அகம்புகல்
மரபின் வாயில்
தலைமகளின் அகமாகிய இல்லின் கண்ணே புகுந்து பழகி அறியும் முறைமையினையுடைய தூது.