Primary tabs
தமிழில் வடமொழிக் கலப்பு என்பது கழகக் காலத்தில் 3% தொடங்கி 10ஆம் நூற்றாண்டுக்குப்பின் 50% உள்ள ‘மணிப்பிரவாளமாக உருவெடுத்த காலம்வரை கடும் தாக்கத்தை உண்டாக்கியிருந்தது. ஆனால், மறைமலையடிகளை வழிகாட்டியாகக் கொண்டு பாவாணர் எடுத்த முயற்சியின் விளைவால் வடமொழியை அறவே களைந்து எறிந்துவிட்டு, முற்றிலும் தனித்தமிழிலே எழுத முடியும் பேச முடியும் எனும் நிலையை எட்டிவிட்டோம்.
ஆனால் இன்று மற்றொரு நோய் நம்மைப் பிடித்து ஆட்டுகிறது. ஆம்! ஆங்கிலம் கலந்து எழுதுவது, ஆங்கிலம் கலந்து பேசுவது என்ற ‘தமிங்கில‘ப் போக்கு மிகுதியாகிவிட்டது. எனினும் ஆங்கிலக் கலப்பினை எளிதில் நீக்கிவிடமுடியும்.
‘தமிழில் வடமொழிக் கலப்பு என்பது பாலில் தண்ணீர் கலந்ததற்கு ஒப்பாகும்; பாலிலிருந்து தண்ணீரைப் பிரிப்பதுதான் கடுமையாகும்; எனினும் அதையே எளிதாகச் செய்துவிட்டோம்.
தமிழில் ஆங்கிலக் கலப்பு என்பது தண்ணீரில் எண்ணெய் கலந்ததற்கு ஒப்பாகும்; இதனை எளிதில் பிரித்துவிட முடியும்.
கொஞ்சம் பொறுப்புணர்ச்சி இருந்தால் போதும்; பிறமொழிக் கலப்புப் பின்னங்கால் பிடரியில்பட ஓடிவிடும்; இதற்கு மிகவும் தேவை, தாழ்வு மனப்பான்மையை அறவே நீக்கிக்கொள்வதுதான். ஆங்கிலத்தில் சில சொற்களையாவது பேசினால்தான் மதிப்பு என்றும், அப்போதுதான் படித்தவர் வரிசையில் சேரமுடியும் என்றும் ‘தமிழர்கள்‘ எப்போது கருதத் தொடங்கினார்களோ அப்போதே நேர்ந்தது கேடு.
நம் மொழி உயர்ந்தது; நாம் யார்க்கும் அடிமையாக இல்லை; அடிமையாக இருக்க வேண்டிய தேவையும் இல்லை என்று துணிந்து எழுந்தால் பாவாணர் கொள்கை நிறைவேறும்.
வாழ்வுணர்ச்சி காணும் வழி"