Primary tabs
-
5.0 பாட முன்னுரை
தம்முள் தொடர்பு உடைய மொழிகள் ஒரு குடும்ப மொழிகள் எனப்படுகின்றன. உலகில் ஏறத்தாழ நாலாயிரம் மொழிகள் பேசப்படுகின்றன. இவற்றைப் பல்வேறு குடும்பங்களாக வகைப் படுத்துவர். இவ்வாறு வகைப் படுத்துவதற்கு அடிப்படைப் பண்புகள், பொதுமைக் கூறுகள், மொழி வழங்கும் இடம் ஆகியவை அடித்தளமாகக் கொள்ளப்படுகின்றன. அவ்வகையில் உலக மொழிகளை எட்டுக் குடும்பங்களாகக் கூறுவர். அவற்றுள் திராவிட மொழிக் குடும்பம் ஏழாவது இடத்தது.
தமிழ், தெலுங்கு, மலையாளம், கன்னடம் போன்ற மொழிகள் திராவிட மொழிக் குடும்பத்து மொழிகளாகும். ஒரு குடும்பத்து மொழிகளை ஆராய்ந்தால், அவற்றுக்கிடையே ஒலி அமைப்பு, இலக்கணக் கூறு, சொற்கள் ஆகியவற்றில் ஒற்றுமை இருத்தலை உணரலாம்.