இதுவும் ஒருவகையால் சொல் பற்றிய அணியே
ஆகும். உள்ளத்தில் உள்ள ஆர்வத்தைச் சொற்கள் மூலம்
வெளிப்படுத்திக் காட்டும் வகையில் அமைந்த அணி ஆகும்.
4.3.1 ஆர்வமொழி அணியின் இலக்கணம்
ஆர்வம் = அன்பு, மகிழ்ச்சி. உள்ளத்திலே தோன்றிய
ஆர்வத்தை வெளிப்படுத்தும் சொற்கள் அதிகம் தோன்றும்படி
சொல்லுவது ஆர்வமொழி அணி எனப்படும்.
''ஆர்வ மொழி மிகுப்பது ஆர்வ மொழியே''
(தண்டி, 68)
எடுத்துக்காட்டு:
சொல்ல மொழிதளர்ந்து சோரும்; துணைமலர்த்தோள்
புல்ல இருதோள் புடைபெயரா; - மெல்ல
நினைவோம் எனில் நெஞ்சு இடம்போதாது; எம்பால்
வனைதாராய்! வந்ததற்கு மாறு
(புல்ல - தழுவ; புடைபெயரா = பக்கங்களில் நீளா;
வனைதாராய் = அழகிய மாலை அணிந்தவனே;
மாறு - கைம்மாறு.)
பாடலின் பொருள்:
அழகிய மாலையை அணிந்தவனே! உனக்கு முன்னே
நின்று மறுமொழி கூறுவதற்கு முயன்றால் எங்களுடைய
சொற்கள் தடுமாறிச் சோர்வுபடுகின்றன; உன்னுடைய இரண்டு
தோள்களைத் தழுவ முயன்றால் எங்களுடைய இரண்டு
தோள்களும் பக்கங்களில் நீண்டு வளர்ந்தவை அல்ல; மெல்ல
உன்னுடைய புகழை நினைப்போமாயின் எங்களுடைய
உள்ளத்தில் அதற்கு இடம் போதாது; நீ எம் இருப்பிடம்
நோக்கி வந்த உன்னுடைய இப்பெருமைக்கு யாம் என்ன
கைம்மாறு செய்ய முடியும்?
• அணிப்பொருத்தம்
இப்பாடலில், தலைவி தலைவன்பால் கொண்டுள்ள
அன்பு மிகுதியை 'மொழிதளர்ந்து சோரும், தோள் புடைபெயரா,
நெஞ்சு இடம்போதாது' என மிகுதியான ஆர்வமொழிகள்
கொண்டு வெளிப்படுத்துவதால் இது ஆர்வமொழி அணி
ஆயிற்று.
தன் மதிப்பீடு : வினாக்கள் - I
இலேச அணியின் இலக்கணம் யாது?
இலேச அணியின்பால் படும் அணிகள் யாவை?
வஞ்சப் புகழ்ச்சி அணி என்றால் என்ன?
வஞ்சப் புகழ்ச்சி அணி அமைந்த
புறப்பாடலைப் பாடியவர் யார்?
நிரல்நிறை அணியின் இலக்கணம் யாது?
நிரல்நிறை அணி எத்தனை வகைப்படும்?
அவை யாவை?
நிரல்நிறை அணியை நன்னூல் எவ்வாறு
கூறுகின்றது?
''ஆர்வ மொழி மிகுப்பது ஆர்வ மொழியே''(தண்டி, 68)