Primary tabs
சேரமான் அந்துவஞ்சேரல் இரும்பொறை
13
'இவன் யார்?' என்குவை ஆயின், இவனே
புலி நிறக் கவசம் பூம் பொறி சிதைய,
எய் கணை கிழித்த பகட்டு எழில் மார்பின்,
மறலி அன்ன களிற்று மிசையோனே;
5
களிறே, முந்நீர் வழங்கு நாவாய் போலவும்,
பல் மீன் நாப்பண் திங்கள் போலவும்,
சுறவினத்து அன்ன வாளோர் மொய்ப்ப,
மரீஇயோர் அறியாது, மைந்து பட்டன்றே;
நோய் இலன் ஆகிப் பெயர்கதில் அம்ம!
10
பழன மஞ்ஞை உகுத்த பீலி
கழனி உழவர் சூட்டொடு தொகுக்கும்,
கொழு மீன், விளைந்த கள்ளின்,
விழு நீர் வேலி நாடு கிழவோனே.
திணை பாடாண் திணை; துறை
வாழ்த்தியல்.
சோழன் முடித் தலைக் கோப்
பெருநற்கிள்ளி கருவூரிடம் செல்வானைக் கண்டு,சேரமான்
அந்துவஞ் சேரல் இரும்பொறையோடு வேண்மாடத்து மேல்
இருந்து,உறையூர் ஏணிச்சேரி முட மோசியார் பாடியது.