Primary tabs
maturai marutan iLan'Akan, maturai marutan iLan'AkanAr, marutan iLan'AkanAr
34. mullai
ciRu karum piTavin veN talaik kuRum putal
kaNNiyin malarum taN n'aRum puRavil,
toTutOR kAnavan kavai poRuttanna
iru tiri maruppin aNNal iralai
5
ceRi ilaip patavin ceg kOl men kural
maRi ATu marugkin maTap piNai arutti,
teL aRal tazIiya vAr maNal aTaikarai,
melkiTu kavuLa tujcu puRam kAkkum
perun'takaikku uTain'ta n'ejcam EmuRa,
10
celka, tErE n'al valam peRun'a!
pacai kol mel viral, perun' tOL, pulaitti
tuRai viTTanna tU mayir ekinam
tuNaiyoTu tiLaikkum kAppuTai varaippil,
cen' tArp paig kiLi munkai En'ti,
15
'inRu varal uraimO, cenRicinOr tiRattu' ena,
illavar aRital ajci, mellena
mazalai in col payiRRum
n'ANuTai arivai mAN n'alam peRavE.
vinai muRRiya talaimakan tErppAkaRkuc colliyatu. - maturai marutan iLan'AkanAr
59. pAlai
taN kayattu amanRa vaNTu paTu tuNai malarp
perun' takai izan'ta kaNNinai, peritum
varun'tinai, vAziyar, n'IyE! vaTAatu
vaN punal tozun'ai vAr maNal akan tuRai,
5
aNTar makaLir taN tazai uTIiyar
maram cela mititta mAal pOla,
pun talai maTap piTi uNIiyar, am kuzai,
n'eTu n'ilai yAam oRRi, n'anai kavuL
paTi jimiRu kaTiyum kaLiRE tOzi!
10
cUr marugku aRutta cuTar ilai n'eTu vEl,
cinam miku murukan taN paragkunRattu,
an'tuvan pATiya can'tu kezu n'eTu varai,
in tIm paij cunai IraNip polin'ta
taN n'aRug kazun'Irc ceN iyaR ciRupuRam
15
tAm pArATTiya kAlaiyum uLLAr
vIgku iRaip paNait tOL n'ekiza, cEy n'ATTu
aruj ceyaR poruTpiNi munni, n'ap
pirin'tu, cEN uRain'ar cenRa ARE.
talaimakan pirivinkaN vERupaTTa kizattikkut tOzi colliyatu.- maturai marutan iLan'Akan
77. pAlai
'n'al n'utal pacappavum, ALvinai tarIiyar,
tun arug kAnam tunnutal n'anRu' enap
pinninRu cUzn'tanai Ayin, n'anRu innAc
cUzn'ticin vAziya, n'ejcE! veytuRa
5
iTi umiz vAnam n'Igki, yAgkaNum
kuTi patippeyarn'ta cuTTuTai mutu pAz,
kayiRu piNik kuzici Olai koNmAr,
poRi kaNTu azikkum AvaNamAkkaLin,
uyir tiRam peyara, n'al amark kaTan'ta
10
taRukaNALar kuTar tarIi, teRuvara,
cej cevi eruvai, ajcuvara ikukkum
kal atark kavalai pOkin, cIRUrp
pul arai ittip pukar paTu n'Izal
el vaLi alaikkum, iruL kUr mAlai,
15
vAnavan maRavan, vaNagkuvil taTak kai,
AnA n'aRavin vaN makiz, piTTan
porun'tA mannar aruj camattu uyartta
tirun'tuilai eHkam pOla,
arun' tuyar tarum, ivaL pani vAr kaNNE.
talaimakan piriyak karutiya n'ejciRkuc collic celavazugkuvittatu.- marutan iLa n'AkanAr
90. n'eytal
mUttOr anna veN talaip puNari
iLaiyOr ATum varimanai citaikkum
taLai aviz tAzaik kAnal am perun' tuRai,
cil cevittu Akiya puNarcci alar eza,
5
ilvayiR ceRittamai aRiyAy; pal n'AL
varu mulai varuttA, am pakaTTu mArpin,
terumaral uLLamoTu varun'tum, n'invayin,
'n'Igkuka' enRu, yAn yAgganam mozikO?
arun' tiRaR kaTavuT cellUrk kuNAatu
10
perug kaTal muzakkiRRu Aki, yANar,
irumpu iTam paTutta vaTuvuTai mukattar,
karug kaT kOcar n'iyamam Ayinum,
'uRum' enak koLkun'ar allar
n'aRu n'utal arivai pAcizai vilaiyE.
pakaRkuRi van'tu kaNNuRRu n'Igkum talaimakanait tOzi etirppaTTu n'inRu, iRceRippu aRivuRIiyatu. - maturai marutan iLan'AkanAr
104. mullai
vEn'tu vinai muTittakAlai, tEm pAyn'tu
ina vaNTu Arkkum taN n'aRum puRavin
ven vEl iLaiyar inpuRa, valavan
vaLpu valittu Urin allatu, muL uRin
5
mun'n'Ir maNTilam Ati ARRA
n'al n'Alku pUNTa kaTum pari n'eTun' tEr,
vAgkucinai poliya ERi; putala
pUg koTi avaraip poy ataL anna
uL il vayiRRa, veLLai veN maRi,
10
mAzkiyanna tAz peruj ceviya,
pun talaic ciRArOTu ukaLi, manRuzaik
kavai ilai Arin am kuzai kaRikkum
cIRUr pala piRakku oziya, mAlai
initu ceytanaiyAl en'tai! vAziya!
15
pani vAr kaNNaL pala pulan'tu uRaiyum
Ay toTi arivai kUn'taR
pOtu kural aNiya vEytan'tOyE!
vinai muRRi mILum talaimakaRkut tOzi colliyatu.- maturai marutan iLan'AkanAr
121. pAlai
n'Am n'akai uTaiyam n'ejcE! kaTun' teRal
vEnil n'ITiya vAn uyar vazin'AL,
vaRumai kUriya maN n'Irc ciRu kuLat
toTukuzi marugkil tuvvAk kalagkal
5
kanRuTai maTap piTik kayan'talai maNNi,
cERu koNTu ATiya vERupaTu vayak kaLiRu
ceg kOl vAl iNar tayagkat tINTi,
cori puRam urijiya n'eRi ayal marA attu
alkuRu vari n'izal acaii, n'ammoTu
10
tAn varum enpa, taTa men tOLi
uRukaN mazavar uruL kINTiTTa
ARu cel mAkkaL cORu poti veN kuTai
kanai vicaik kaTu vaLi eTuttalin, tuNai cettu
veruL ERu payirum AgkaN,
15
karu muka mucuvin kAnattAnE.
tOziyAl talaimakaLai uTanvarum enak kETTa talaimakan n'ejciRkuc colliyatu. - maturai marutan iLan'Akan
131. pAlai
'vicumpu uRa n'ivan'ta mAt tAL ikaNaip
pacug kEz mel ilai aruku n'eRittanna,
vaNTu paTupu iruLiya, tAz irug kUn'tal
curumpu uNa virin'ta perun' taN kOtai
5
ivaLinum ciRan'tanRu, Ital n'amakku' ena
vILai ampin vizut toTai mazavar
n'AL A uytta n'Ama vej curattu
n'aTai melin'tu ozin'ta cEN paTar kanRin
kaTaimaNi ukun'Ir tuTaitta ATavar
10
peyarum pITum ezuti, atartoRum
pIli cUTTiya piRagkun'ilai n'aTukal
vEl UnRu palakai vERRu munai kaTukkum
veruvaru takun'a kAnam, 'n'ammoTu
varuka' ennutiAyin,
15
vArEn; n'ejcam! vAykka n'in vinaiyE.
poruL kaTaikkUTTiya n'ejciRkut talaimakan colliyatu. maturai marutan iLan'AkanAr
184. mullai
kaTavuT kaRpoTu kuTikku viLakku Akiya
putalvaR payan'ta pukaz miku ciRappin
n'annarATTikku anRiyum, enakkum
initu AkinRAl; ciRakka, n'in AyuL!
5
arun' tozil muTitta cemmal uLLamoTu
curumpu imir malara kAnam piRpaTa,
veN piTavu avizn'ta vI kamaz puRavil
kuNTaik kOTTa kuRu muL kaLLip
pun talai putaitta kozug koTi mullai
10
Ar kazal putup pU uyirppin n'Ikki,
teL aRal parukiya tirimaruppu eziR kalai
puLLi am piNaiyoTu vatiyum AgkaN,
kOTuTaik kaiyar, tuLar eRi vinaijar,
ariyal Arkaiyar, viLaimakiz tUgka,
15
celkatir mazukiya uruva jAyiRRuc
cekkar vAnam cenRa pozutil,
kaR pAl aruviyin olikkum n'al tErt
tAr maNi pala uTan iyampa
cIr miku kurucil! n'I van'tu n'inRatuvE.
talaimakan vinaivayiR pirin'tu van'tu eytiya iTattu, tOzi pullu makizvu uraittatu. - maturai marutan iLan'AkanAr
193. pAlai
kAn uyar marugkil kavalai allatu,
vAnam vENTA vil Er uzavar
peru n'AL vETTam, kiLai eza vAytta,
poru kaLattu ozin'ta kurutic cev vAy,
5
poRitta pOlum vAl n'iRa eruttin,
aNin'ta pOlum cej cevi, eruvai;
kuRum poRai ezun'ta n'eTun' tAL yAattu
arug kavaTTu uyarcinaip piLLai UTTa,
virain'tu vAy vazukkiya kozug kaN Un taTi
10
kol paci mutu n'ari valci Akum
curan n'amakku eLiyamannE; n'al manaip
pal mAN tagkiya cAyal, in mozi,
murun'tu Er muRuval, iLaiyOL
perun' tOL in tuyil kaiviTukalanE.
poruL valitta n'ejciRkuc colli, talaimakan celavu azugkiyatu. - maturai marutan iLan'AkanAr
206. marutam
en enappaTumkol tOzi! n'al makizp
pETip peN koNTu ATukai kaTuppa,
n'akuvarap paNaitta tiri maruppu erumai
mayirk kavin koNTa mAt tOl irum puRam,
5
ciRu tozil makAar ERi, cENOrkkut
tuRukal man'tiyin tOnRum Uran,
mAri Igkai mAt taLir anna
am mA mEni, Ay izai, makaLir
Aram tAgkiya alarmulai Akattu
10
ArAk kAtaloTu tAr iTai kuzaiya,
muzavu mukam pularA vizavuTai viyal n'akar,
vatuvai mEvalan Akalin, atu pulan'tu,
aTupOr vELir vIrai muntuRai,
n'eTu veL uppin n'irampAk kuppai,
15
peru peyaRku urukiyAagku,
tirun'tuizai n'ekizn'tana, taTa men tOLE?
vAyil vENTic cenRa viRalikkut talaimakaL vAyil maRuttatu. - maturai marutan iLan'AkanAr
220. n'eytal
Urum cEriyum uTan iyain'tu alar eza,
tEroTu maRukiyum, paNi mozi payiRRiyum,
keTAat tIyin uru kezu cellUr,
kaTAa yAnaik kuzUuc camam tataiya,
5
man marugku aRutta mazu vAL n'eTiyOn
mun muyanRu aritinin muTitta vELvi,
kayiRu arai yAtta kAN taku vanappin,
arug kaTi n'eTun' tUN pOla, yAvarum
kANalAkA mAN ezil Akam
10
uLLutoRum panikkum n'ejcinai, n'IyE
n'eTum puRa n'ilaiyinai, varun'tinaiAyin,
muzagku kaTal Otam kAlaik koTkum,
pazam pal n'ellin UNUr AgkaN,
n'OlA irum puL pOla, n'ejcu amarn'tu,
15
kAtal mARAk kAmar puNarcciyin,
irug kazi mukan'ta ceg kOl av valai
muTagku puRa iRavoTu ina mIn ceRikkum
n'eTug katirk kazanit taN cAykkAnattu,
yANart taN paNai uRum ena, kAnal
20
Ayam Ayn'ta cAy iRaip paNait tOL
n'al ezil citaiyA Emam
col init teyya, yAm teLiyumARE.
iravukkuRi van'tu n'Igkum talaimakanai etirppaTTut tOzi colliyatu. -maturai marutan iLan'AkanAr
245. pAlai
'uyirinum ciRan'ta oN poruL tarumAr
n'anRu puri kATciyar cenRanar, avar' ena
manai valittu oziyum matukaiyaL Atal
n'I n'aRku aRin'tanaiAyin, n'Igki,
5
mazai peyal maRan'ta kazai tiragku iyavil,
cel cAttu eRiyum paNpu il vAzkkai
val vil iLaiyar talaivar, el uRa,
vari kiLar paNait tOL, vayiRu aNi titalai,
ariyalATTiyar alku manai varaippil,
10
makiz n'oTai peRAarAki, n'anai kavuL
kAna yAnai veN kOTu cuTTi,
manRu OTu putalvan pun talai n'Ivum
aru munaip pAkkattu alki, vaikuRa,
n'izal paTak kavinRa n'IL arai ilavattu
15
azal akain'tanna alagkucinai oN pUk
kuzal icait tumpi Arkkum AgkaN,
kuRum poRai uNagkum tatar veL enpu
kaTug kAl oTTakattu alku paci tIrkkum
kal n'eTug kavalaiya kAnam n'In'ti,
20
am mA arivai oziya,
cenmO n'ejcam! vAralen yAnE.
poruL kaTaikkUTTiya n'ejcinaik kazaRi, talaimakan colli, celavu azugkiyatu. - maturai marutan iLan'AkanAr
255. pAlai
ulaku kiLarn'tanna uru kezu vagkam
pulavut tiraip perug kaTal n'Ir iTaip pOza,
iravum ellaiyum acaivu inRu Aki,
virai celal iyaRkai vagkUz ATTa,
5
kOTu uyar tiNi maNal akan tuRai, n'IkAn
mATa oL eri marugku aRin'tu oyya,
AL vinaip pirin'ta kAtalar n'AL pala
kaziyAmaiyE, azi paTar akala,
varuvarmannAl tOzi! taN paNaip
10
poru punal vaippin n'am Ur AgkaN,
karuviLai muraNiya taN putal pakanRai
peru vaLam malara alli tINTi,
palavuk kAyp puRatta pacum pazap pAkal
kUtaLa mUtilaik koTi n'irait tUgka,
15
aRan inRu alaikkum AnA vATai
kaTi manai mATattuk kagkul vIca,
'tirun'tuizai n'ekizn'tu perug kavin cAya,
n'irai vaLai Urun' tOL' ena,
uraiyoTu cellum anpinarp peRinE.
piriviTai vERupaTTa talaimakaL, ARRAmai mItUra, tOzikkuc colliyatu. -maturai marutan iLan'AkanAr
269. pAlai
toTi tOL ivarka! evvamum tIrka!
n'eRi irug katuppin kOtaiyum punaika!
ERuTai ina n'irai peyara, peyarAtu,
ceRi curai veL vEl mazavart tAgkiya
5
taRukaNALar n'al icai n'iRumAr,
piTi maTin'tanna kuRumpoRai marugkin,
n'aTTa pOlum n'aTAa n'eTug kal
akal iTam kuyinRa pal peyar maNNi,
n'aRu virai majcaL Irm puRam poliya
10
ampu koNTu aRutta Ar n'Ar urivaiyin
cem pUg karan'tai punain'ta kaNNi
vari vaNTu Arppac cUTTi, kazaR kAl
iLaiyar patip peyarum aruj curam iRan'tOr,
taii n'inRa taN peyal kaTai n'AL,
15
polagkAcu n'iraitta kOTu En'tu alkul
n'alam kEz mAk kural kuzaiyoTu tuyalvara,
pATu Urpu ezutarum paku vAy maNTilattu
vayir iTaippaTTa teL viLi iyampa,
vaNTaR pAvai uNtuRait tarIi,
20
tiru n'utal makaLir kuravai ayarum
peru n'Irk kAnal tazIiya irukkai,
vANan ciRukuTi, vaNagku katir n'ellin
yANart taN paNaip pOtu vAy avizn'ta
oN ceg kazun'Ir anna, n'in
25
kaN pani tuTaimAr van'tanar, virain'tE.
piriviTai vERupaTTa talaimakaLait tOzi vaRpuRuttiyatu. - maturai marutan iLan'AkanAr
283. pAlai
n'al n'eTug katuppoTu perun' tOL n'Ivi,
n'in ivaN ozital ajciya enninum,
celavu talaikkoNTa peru vituppu uRuvi
pal kavar maruppin mutu mAn pOkki,
5
cil uNAt tan'ta cIRUrp peNTir
tirivayin, tevuTTum cEN pulak kuTijaip
paital men kural aitu van'tu icaittoRum,
pOkun'ar pulampum ARE EkutaRku
ariya Akum ennAmai, kari maram
10
kaN akai iLag kuzai kAlmutal kavini,
vicumpuTan iruNTu, vemmai n'Igka,
pacug kaN vAnam pAy taLi pozin'tena,
pul n'ukumpu eTutta n'al n'eTug kAnattu,
UTTuRu pajcip picir paran'tanna
15
vaNNa mUtAy taN n'ilam varippa,
iniya Akuka taNin'tE
innA n'Ippin n'innoTu celaRkE.
uTanpOkku valitta tOzi talaimakaRkuc colliyatu. - maturai marutan iLan'AkanAr
297. pAlai
pAnAT kagkulum, perum pun mAlaiyum,
AnA n'OyoTu azi paTark kalagki,
n'amvayin inaiyum iTumpai kaimmika,
ennai AkumO, n'ejcE! n'am vayin
5
irug kavin illAp perum pun tATi,
kaTugkaN, maRavar pakazi mAyttena,
marugkul n'uNukiya pEem mutir n'aTukal,
peyar payam paTarat tOnRu kuyil ezuttu
iyaipuTan n'OkkalcellAtu, acaivuTan
10
ARu cel vampalar viTTanar kaziyum
cUr mutal irun'ta Omai am puRavin,
n'Ir muL vElip pulavu n'ARu munRil,
ezutiyanna koTi paTu verukin
pULai anna pogku mayirp piLLai,
15
mati cUz mInin, tAy vazippaTUum
ciRukuTi maRavar cEk kOL taNNumaikku
eruvaic cEval iruj ciRai peyarkkum
veru varu kAnam, n'ammoTu,
'varuval' enROL makiz maTa n'OkkE?
poruLvayiR pOkAn'inRa talaimakan tan n'ejciRkuc colliyatu. - maturai marutan iLan'AkanAr
312. kuRijci
n'ejcu uTampaTutalin onRu purin'tu aTagki,
iravin varUum iTumpai n'Igka,
varaiyak karutum Ayin, peritu uvan'tu,
Ogku varai izitarum vIgku peyal n'Ittam,
5
kAn'taL am ciRukuTik kauvai pENAtu,
ari matar mazaik kaN civappa, n'ALaip
peru malai n'ATan mArpu puNai Aka,
ATukam vammO kAtal am tOzi!
vEy payil aTukkam putaiyak kAl vIzttu,
10
in icai muracin iragki, onnAr
OTu puRam kaNTa, tAL tOy taTak kai,
vel pOr vazuti cel camattu uyartta
aTu pukaz eHkam pOla,
koTi paTa minnip pAyinRAl, mazaiyE!
talaimakan ciRaippuRamAkat tOzi colliyatu; talaimakaL colliyatUum Am. -maturai marutan iLan'AkanAr
343. pAlai
vAgku amai puraiyum vIgku iRaip paNait tOL,
cil cuNagku aNin'ta, pal pUN, men mulai,
n'al ezil, Akam pullutal n'ayan'tu,
maram kOL umaN makan pErum parutip
5
pun talai citaitta van talai n'aTukal
kaNNi vATiya maNNA marugkul,
kUr uLi kuyinRa kOTu mAy ezuttu, av
ARu cel vampalar vERu payam paTukkum
kaN pori kavalaiya kAnattu AgkaN,
10
n'anan'talai yAattu am taLirp peruj cinai,
il pOl n'Izal cel veyil ozimAr,
n'eTuj cevik kazutaik kuRug kAl ERRaip
puRam n'iRai paNTattup poRai acAak kaLain'ta
peyar paTai koLLArkku uyavut tuNai Aki,
15
uyarn'ta ALvinai purin'tOy; peyarn'tu n'inRu
uLLinai vAzi, en n'ejcE! kaLLin
makizin makizn'ta ari matar mazaik kaN,
cil mozip polin'ta tuvar vAy,
pal mAN pEtaiyin pirin'ta n'IyE.
talaimakan iTaic curattu mILak karutiya n'ejcinaik kazaRip pOyatu. -maturai marutan iLan'AkanAr
358. kuRijci
n'Ilattu anna n'iRam kiLar eruttin,
kAmar pIli, Ay mayil tOkai
in tIm kurala tuvanRi, men cIr
ATu takai ezil n'alam kaTuppak kUTi,
5
kaN n'Er itaza, taN n'aRug kuvaLaik
kuRun' toTar aTaicciya n'aRum pal kUzai
n'ITu n'Ir n'eTuj cunai AyamoTu ATAy,
uyagkiya manattaiyAki, pulampu koNTu,
innai Akiya n'in n'iRam n'Okki,
10
annai vinavinaL Ayin, annO!
en ena uraikkO yAnE tunniya
peru varai izitarum n'eTu veL aruvi,
OTai yAnai uyar micai eTutta
ATu koTi kaTuppa, tOnRum
15
kOTu uyar veRpan uRIiya n'OyE?
pakalE ciRaippuRamAkat tOzi talaimakaTkuc colliyatu. - maturai marutan iLan'AkanAr
365. pAlai
akal vAy vAnam mAl iruL parappa,
pakal ARRuppaTutta paiyen tORRamoTu
cinaval pOkiya punkaN mAlai,
atta n'aTukal AL ena utaitta
5
kAna yAnaik katuvAy vaL ukir,
irum panai itakkaiyin, oTiyum AgkaN,
kaTugkaN ATavar E muyal kiTakkai,
varun'ar inmaiyin kaLaiyun'ark kANA
enRUz vej curam tan'ta n'IyE
10
tuyar ceytu ARRAyAki, peyarpu, Agku
uLLinai vAziya, n'ejcE! ven vEl
mA vaN kazuvuL kAmUr AgkaN,
pUtam tan'ta pori arai vEgkait
taN kamaz putu malar n'ARum
15
am cil Oti Ay maTat takaiyE.
talaimakan iTaic curattu n'inRu colliyatu.-maturai marutan iLan'AkanAr
368. kuRijci
toTutOR kAnavan cUTuRu viyan punam,
kari puRam kazIiya perum pATTu Irattu,
tOTu vaLar pain' tinai n'ITu kural kAkkum
oN toTi makaLirkku UcalAka
5
ATu cinai ozitta kOTu iNar kajaliya
kuRumpoRai ayalatu n'eTun' tAL vEgkai,
maTa mayiR kuTumiyin, tOnRum n'ATan
uyar varai marugkin kAn'taL am cOlaik
kuragku aRivArA maram payil iRumpil,
10
kaTi cunait teLin'ta maNi maruL tIm n'Ir
piTi puNar kaLiRRin emmoTu ATi,
pal n'AL umparp peyarn'tu, cil n'AL
kaziyAmaiyE vazivazip peruki,
am paNai viLain'ta tEk kaT tERal
15
vaNTu paTu kaNNiyar makizum cIRUr,
evankol vAzi, tOzi! kogkar
maNi arai yAttu maRukin ATum
uLLi vizavin anna,
alar AkinRu, atu palar vAyp paTTE?
pakalE ciRaippuRamAkat talaimakaTkuc colluvALAyt tOzi colliyatu. -maturai marutan iLan'AkanAr
380. n'eytal
tEr cEN n'Ikki, tamiyan van'tu, 'n'um
Ur yAtu?' enna, n'aNi n'aNi otugki,
mun n'AL pOkiya tuRaivan, n'erun'ai,
akal ilai n'Aval uNtuRai utirtta
5
kani kavin citaiya vAgkik koNTu, tan,
tAzai vEr aLai, vIz tuNaikku iTUum
alavaR kATTi, 'n'aRpARRu itu' ena,
n'inain'ta n'ejcamoTu, n'eTitu peyarn'tOnE;
utuk kAN tOnRum, tErE inRum;
10
n'Am etir koLLAm Ayin, tAn atu
tuNikuvan pOlAm; n'ANu mika uTaiyan;
veN maNal n'eTug kOTTu maRaikO?
amma, tOzi! kURumati n'IyE.
pinninRa talaimakaRkuk kuRai n'Ern'ta tOzi talaimakaTkuk kuRai n'ayappak kURiyatu. - maturai marutan iLan'AkanAr
387. pAlai
tirun'tuizai n'ekizn'tu, perun' tOL cAay,
ari matar mazaik kaN kaluzac celvIr!
varuvIr Akutal uraimin mannO
pUk kaN paRain'ta pun talaic ciRAaroTu
5
av vari konRa kaRai cEr vaL ukirp
pacai viral pulaitti n'eTitu picain'tu UTTiya
pUn' tukil imaikkum, polan kAz alkul,
av vari citaiya n'Okki, vev vinaip
payil aril kiTan'ta vETTu viLi verIi,
10
varip puRa italin maNik kaT pETai
n'uN poRi aNin'ta eruttin, kUr muT
ceg kAl, cEval payirum AgkaN,
vil INTu aruj camam tataiya n'URi,
n'al icai n'iRutta n'ANuTai maRavar
15
n'irai n'ilai n'aTukal porun'ti, imaiyAtu,
irai n'acaiik kiTan'ta mutu vAyp palli
ciRiya teRRuvatuAyin, 'periya
OTai yAnai uyarn'tOr Ayinum,
n'inRAgkup peyarum kAnam
20
cenROrman' ena irukkiRpOrkkE.
talaimakaLatu kuRippu aRin'tu, tOzi talaimakanaic celavu azugkac colliyatu. - maturai marutan iLan'AkanAr