Primary tabs
-
5.1 ஒலி மாற்றம் எதனால் நிகழ்கிறது?
ஒரு மொழியின் வரலாற்றைக் காணும்போது அம்மொழி பேசப்படும் பல்வேறு பகுதிகளில் வெவ்வேறு வகையான மாற்றங்கள் காணப்படுகின்றன என்பது தெரியவரும். ஒரு பகுதியில் காணப்படும் மாற்றமே எல்லாப் பகுதியிலும் காணப்பட வேண்டும் என்ற நியதி இல்லை. இந்நிலையில் பல்வேறு மாற்றங்களைக் கொண்டு விளங்கும் ஒரு மொழி பல்வேறு தனிமொழிகளாகப் பிரிகிற நிலை உருவாகிறது.
மனிதன் பேசும் மொழிகள் அனைத்தின் வாழ்விலும் பல்வேறு ஒலி மாற்றஙகள் நிகழ்வது இயற்கை. இத்தகைய மாற்றங்கள் பல்வேறு காரணங்களால் ஏற்படுகின்றன. சில மாற்றங்கள் உடல் கூறின் காரணங்களாலும், இன்னும் சில மாற்றங்கள் சமுதாய அடிப்படையாலும், வேறு சில மாற்றங்கள் மனிதனிடம் காணப்படும் எளிமை, வேட்கை, சோம்பல் ஆகிய காரணங்களாலும் உண்டாகின்றன.