Primary tabs
-
முனைவர்.பீ.மு.அபிபுல்லா
-
1.0 பாட முன்னுரை
மாணவ நண்பர்களே ! பாக்களின் இலக்கணம் பயில இருக்கிறீர்கள். யாப்பு என்னும் சொல்லுக்குக் கட்டுதல் என்பது பொருள் என்பதையும், அசை, தளை, தொடை என்னும் சொற்களும் கட்டுதல், இணைத்தல், தொடுத்தல் ஆகிய பொருள்களைத் தரும் என்பதையும் முந்தைய பாடங்களில் அறிந்திருக்கிறீர்கள். யாப்பு, பாட்டு, செய்யுள், பா, கவிதை எனப் பல்வேறு சொற்களால் அறியப்படும் செய்யுளின் உறுப்புகளாகிய எழுத்து, அசை, சீர், தளை, அடி, தொடை ஆகியவற்றின் இலக்கணங்கள் உங்கள் மனத்தில் நன்கு பதிவாகியிருக்கும் அல்லவா ! அப்பதிவு தெளிவாயிருந்தால் இப்பாடம் தொடங்கி நீங்கள் பயிலவிருக்கும் பா இலக்கணம் உங்களுக்கு எளிமையாக இருக்கும். ஒருவேளை உறுப்பிலக்கண அறிவில் போதுமான தெளிவு இல்லையென்றால், நீங்கள் உறுப்பிலக்கணத்தை (யாப்பருங்கலக் காரிகை, உறுப்பியல்) மீண்டும் ஒருமுறை பயின்ற பின், பா இலக்கணம் பயில்வது நல்லது. உறுப்புகளால் இணைத்துக் கட்டி உருவாக்கப்படும் பாக்களின் இலக்கணங்களை இனிக் காண்போம்.