இந்தியத் தகவல் தொழில்நுட்பச் சட்டம்

6.4 இந்தியத் தகவல் தொழில்நுட்பச் சட்டம்

    இந்தியத் தகவல் தொழில்நுட்பச் சட்டம் (Information Technology Act) 2000-ஆம் ஆண்டு நிறைவேற்றப்பட்டது. இந்தியா சற்றுக் காலந்தாழ்ந்து இந்த முயற்சியை மேற்கொண்ட போதிலும், உலக நாடுகளுடன் ஒப்பிடுகையில் மின்வெளிச் சட்டம் இயற்றியுள்ள மிகச்சில நாடுகளுள் இந்தியாவும் ஒன்று (12-வது நாடு) என்பது குறிப்பிடத் தக்கது. ஐநா மன்றத்தின் மின்வணிக மாதிரிச் சட்டத்தை அடிப்படையாகக் கொண்டே இச்சட்டம் உருவாக்கப்பட்டுள்ளது என முகவுரையிலேயே குறிப்பிடப்பட்டுள்ளது. சிங்கப்பூரின் மின்னணுப் பரிமாற்றச் சட்டமும் அவ்வாறே உருவாக்கப்பட்டதால் இரண்டு சட்டங்களுக்கும் பல்வேறு ஒற்றுமைகள் உள்ளன. மாற்றுமுறை ஆவணங்கள் (Negotiable Instruments), ஒப்பாணை (Power of Atterney), அறக்கட்டளை (Trust), உயில் (Will), அசையாச் சொத்துகளின் விற்பனை ஒப்பந்தம், அசையாச் சொத்துகள் அவற்றின் உரிமைகள் தொடர்பான ஆவணங்கள், மைய அரசு குறிப்பிடும் இதுபோன்ற ஆவணங்களுக்கு இச்சட்டத்தின் விதிமுறைகள் பொருந்தாது என முதல் பாகத்திலேயே எடுத்துக் காட்டப்பட்டுள்ளது. இந்தியத் தொழில்நுட்பச் சட்டத்தின் பிற சிறப்புக்கூறுகளை இப்பாடப் பிரிவில் விரிவாகக் காண்போம்.

6.4.1 மின்னணு ஆவணமும் துடிமக் கையொப்பமும்

    தகவல் தொழில்நுட்பச் சட்டத்தின் இரண்டாம் பாகத்தில் மின்னணு ஆவணங்களும் துடிமக் கையொப்பமும் செல்லுபடியாகும் என்று வரையறுக்கப் பட்டுள்ளது. சிங்கப்பூர் சட்டத்தில் மின்னணுக் கையொப்பமும், துடிமக் கையொப்பமும் வேறுபடுத்திக் காட்டப்பட்டுள்ளதுபோல் இல்லாமல், இந்தியச் சட்டத்தில் இரண்டும் ஒன்றாகவே விளக்கப்பட்டுள்ளது. ஓர் ஆவணம் எழுதப்பட்டு அல்லது தட்டச்சிடப்பட்டு அல்லது அச்சிடப்பட்டுத்தான் இருக்க வேண்டும் என்று ஏதேனுமொரு சட்டம் வலியுறுத்துகின்ற போதிலும் அந்த ஆவணம் மின்னணு வடிவில் உருவாக்கப்பட்டுப் பின்னாளில் பயன்படுத்திக் கொள்ள இயலும் வகையில் வைக்கப்பட்டுள்ளது எனில் அந்த ஆவணம் அச்சட்டத்தின்படி செல்லுபடியாகத் தக்கவதாகவே கொள்ளப்படும். அதாவது எழுத்து வடிவ ஆவணங்களைப் போலவே மின்னணு ஆவணங்களும் சட்டப்படியானதாகவே கருதப்படும்.

    ஒரு தகவல் அல்லது ஏதேனும் விவரம் கையொப்பம் இட்டுச் சான்றளிக்கப்பட வேண்டும் அல்லது ஓர் ஆவணத்தில் ஒரு நபரின் கையொப்பம் இடப்பட்டிருக்க வேண்டும் என ஏதேனும் ஒரு சட்டத்தில் வரையறுத்துள்ள போதிலும், மைய அரசு குறித்துக் காட்டியுள்ள முறையில் அத்தகவலோ, விவரமோ துடிமக் கையொப்பம் மூலம் சான்றளிப்புச் செய்யப்பட்டிருப்பின், அச்சட்டத்தில் என்ன கூறியிருப்பினும், அச்சட்டத்தின்படி உள்ளதாகவே கொள்ளப்படும். அதாவது, எழுத்து வடிவிலான கையொப்பம் போலவே துடிமக் கையொப்பமும் சட்டப்படியானதாகவே கருதப்படும்.

    அரசு ஆவணங்கள் துடிமக் கையொப்பமிட்ட ஆவணங்களாகவோ, மின்னணு ஆவணங்களாகவோ இருக்கலாம் என அனுமதி அளிக்கப்பட்டுள்ளது. அரசு அலுவலகத்தில் பதிவுசெய்து வைக்கப்படுகின்ற எந்தவொரு படிவமும், விண்ணப்பமும் அல்லது ஆவணமும் மின்னணு வடிவில் இருக்கலாம். அரசு வழங்குகின்ற உரிமம், அனுமதி, அங்கீகாரம், ஒப்புதல் அல்லது வேறெந்தப் பெயரில் அழைக்கப்பட்டாலும் அது மின்னணு வடிவில் இருக்கலாம். பெறுகை (Receipt), செலுத்துகை (Payment), இரண்டுக்குமான ஒப்புகைக்கும் இது பொருந்தும். மேற்கண்ட ஆவணங்களை உருவாக்குதல், இருத்திவைத்தல், பாதுகாத்தல் அனைத்தையும் அரசு வரையறுத்துள்ள மின்னணு வடிவிலேயே செய்யலாம். மின்னணு ஆவணங்களை எந்த முறையில், எந்த வடிவில் உருவாக்க, கோப்பிட, இருத்திவைக்க, வினியோகிக்க வேண்டும் என்பதையும், செலுத்தப்பட வேண்டிய கட்டணங்களை மின்னணு வடிவில் எவ்வாறு செலுத்த வேண்டும் என்கிற வழிமுறைகளையும் அரசு வரையறை செய்யும்.

    அரசு அலுவலகங்களில் ஒரு குறிப்பிட்ட ஆவணம் அல்லது தகவல் குறிப்பிட்ட காலம்வரை பாதுகாக்கப்பட வேண்டும் என்று சட்டவிதி இருக்குமெனில் இத்தகைய ஆவணம் அல்லது தகவல், மின்னணு வடிவில் சேமித்து வைக்கப்பட்டாலும் சட்டப்படி ஏற்றுக் கொள்ளப்படும். ஆனால் கீழ்க்காணும் நிபந்தனைகள் நிறைவு செய்யப்பட வேண்டும்:

    மேற்கண்ட சட்டவிதிகளைக் காட்டி ஓர் ஆவணத்தை மின்னணு வடிவில்தான் உருவாக்க, ஏற்க, வெளியிட, இருத்திவைக்க, பாதுகாக்க வேண்டும் என்று எந்தவொரு நபரும், மைய அரசின் எந்தவோர் அமைச்சகத்தையோ, துறையையோ, மாநில அரசையோ அல்லது அரசு நிறுவனங்களையோ கட்டாயப்படுத்த முடியாது.

    முறையாக அதிகாரப்பூர்வ அரசிதழில் (Official Gezette) வெளியிடப்பட வேண்டிய அரசாங்கத்தின் எந்தவொரு சட்டதிட்ட ஆணை, அறிவிப்பு அல்லது அதுபோன்ற எந்தத் தகவலும் மின்னணு வடிவிலும் வெளியிடப்படலாம். அரசிதழ், அச்சிலும் மின்னணு வடிவிலும் வெளியிடப்படுமாயினும் இரண்டில் முதலில் எது வெளியானதோ அது வெளியான நாளே அரசிதழில் அத்தகவல் வெளியிடப்பட்ட நாளாகக் கருதப்படும்.

6.4.2 துடிமக் கையொப்பச் சான்றிதழ்

    துடிமக் கையொப்பம் என்பது தனித்திறவி, பொதுத்திறவி அடிப்படையில் உருவாக்கப்படும் மறைக்குறியீட்டு முறைமை ஆகும். இத்திறவிகளை வாடிக்கையாளர்களுக்கு வழங்குவதற்கென அரசிடம் உரிமம் பெற்ற தனி நிறுவனங்கள் இருக்கும். துடிமக் கையொப்பம் தேவைப்படும் ஒருவர் உரிமம் பெற்ற நிறுவனத்திடம் விண்ணப்பிக்க வேண்டும். அதற்குரிய கட்டணத்தைச் செலுத்த வேண்டும். அக்கட்டணம் 25 ஆயிரம் ரூபாய்க்கு மேற்படாமல் இருக்கும். கட்டணத் தொகை அவ்வப்போது அரசினால் நிர்ணயிக்கப்படும். தேவையான விசாரணைகள் மேற்கொண்டபின் சட்ட விதிகளின்படி வாடிக்கை யாளருக்குத் தகுதி இருப்பின் அவருக்குத் துடிமக் கையொப்பச் சான்றிதழ் (Digital Signature Certificate) வழங்கப்படும். அல்லது போதிய காரணங்கள் கூறி சான்றிதழ் தர மறுக்கலாம். துடிமக் கையொப்பச் சான்றிதழில் தனித்திறவி, பொதுத்திறவி பற்றிய விவரங்கள் இருக்கும்.

    வாடிக்கையாளரின் விண்ணப்பத்தின் பேரிலோ அல்லது பொதுநலன் கருதியோ துடிமக் கையொப்பச் சான்றிதழின் செயல்பாட்டைத் தற்காலிகமாக நிறுத்தி வைக்கலாம். 15 நாட்களுக்கு மேல் நிறுத்தி வைக்க வேண்டுமெனில் அவருடைய கருத்தினைக் கேட்டு அறிய வேண்டும். கீழ்க்காணும் காரணங்களுக்காக ஒருவருக்கு வழங்கப்பட்ட துடிமக் கையொப்பச் சான்றிதழ் நிரந்தரமாகத் திரும்பப் பெறப்படலாம்:

    5-வது, 6-வது காரணத்துக்காகத் திரும்பப் பெறப்பட்டால், உரியவருக்குத் தகவல் தெரிவிக்க வேண்டும்.

    சான்றிதழ் வழங்க உரிமம் பெற்ற நிறுவனங்கள் உரிமத்தைத் தங்கள் அலுவலகத்தில் அனைவரின் பார்வையில் படும்படி வைக்க வேண்டும். துடிமக் கையொப்பங்களின் இகசியத் தன்மை கெடாதவாறு நிறுவனத்தின் வன்பொருள், மென்பொருள் மற்றும் செயல்முறைகளைப் பாதுகாப்பாக வைத்துக் கொள்ள வேண்டும். எவரும் தீங்கெண்ணத்துடன் அத்துமீறித் தலையிடவோ, பாது காப்பான விவரங்களைத் தவறான முறையில் பயன்படுத்தவோ அனுமதிக்கக் கூடாது. உரிமம் முடக்கப்பட்ட, இரத்து செய்யப்பட்ட நிறுவனம் உடனடியாக உரிமத்தைக் கட்டுப்பாட்டு ஆணையரிடம் ஒப்படைத்துவிட வேண்டும்.

6.4.3 குற்றங்களும் தண்டனைகளும்

    இந்தியத் தகவல் தொழில்நுட்பச் சட்டத்தில் பல்வேறு வகையான கணிப்பொறிக் குற்றங்களும் அவற்றுக்கான தண்டனைகளும் விவரிக்கப்பட்டுள்ளன. அவற்றை இங்கே சுருக்கமாகக் காண்போம்:

6.4.4 சட்டத் திருத்தங்கள்

    தகவல் தொழில்நுட்பச் சட்டம் நிறைவேற்றப்பட்டபின் அதன் அடிப்படையில் இந்தியாவில் ஏற்கெனவே நடைமுறையில் இருக்கும் சில சட்டங்களில் சில சட்டப் பிரிவுகளில் திருத்தங்கள் கொண்டுவரப்பட்டன. அவற்றுள் சில:

    தகவல் தொழில்நுட்பப் புரட்சி தொடர்ந்து நடைபெற்று வருகிறது. எனவே முற்ற முடிந்த சட்டங்கள் என எதுவும் இருக்க முடியாது. இந்தியத் தகவல் தொழில்நுட்பச் சட்டமும் அப்படியே. இதிலும் அவ்வப்போது திருத்தங்கள் செய்ய நேர்ந்துள்ளது. 2008-ஆண்டில் இந்தியத் தகவல் தொழில்நுட்பத் திருத்தச் சட்டம் நிறைவேற்றப்பட்டுள்ளது. எத்தனையோ நாடுகளில் இன்னும் மின்வெளிச் சட்டங்கள் இயற்றப்படவே இல்லை எனும்போது இந்தியச் சட்டம் ஒரு முன்னோடி என்பதில் ஐயமில்லை.