அமெரிக்க மின்னணுப் பணப் பரிமாற்றச் சட்டம்

(1) பிழைகள் கண்டுபிடிக்கப்பட்டால்:

வாடிக்கையாளர் நிதி நிறுவனத்திலிருந்து தமக்கு அளிக்கப்பட்ட மின்னணுப் பணப் பரிமாற்ற அறிக்கையில் ஏதேனும் பிழை இருப்பதைக் கண்டறிந்தவுடன் அறுபது நாட்களுக்குள் நிதி நிறுவனத்துக்கு அப்பிழையைச் சுட்டிக்காட்டிப் புகார் அளிக்க வேண்டும். அறுபது நாட்களுக்குப் பிறகு தெரிவிக்கப்படும் புகார்களைப் புறக்கணிக்க நிறுவனத்துக்கு உரிமை உண்டு. புகாரைப் பெறும் நிறுவனம் பத்து நாட்களுக்குள் அதைப் பற்றி விசாரணை மேற்கொண்டு உண்மை அறிய வேண்டும். வாடிக்கையாளருக்கு விளக்கத்தைத் தெரிவிக்க, கூட ஒருநாள் எடுத்துக் கொள்ளலாம். அல்லது வாடிக்கையாளர் இழப்பு ஏற்பட்டதாகத் தெரிவித்த தொகையை உடனே வாடிக்கையாளர் கணக்கில் வரவு வைத்துவிட்டு, விசாரணைக்கு 45 நாட்கள் எடுத்துக் கொள்ளலாம். அறிக்கையில் பிழையேதும் இல்லையென விசாரணையில் தெரியவருமாயின் விளக்கத்தை வாடிக்கையாளருக்குத் தெரிவித்தபின் அத்தொகையைத் திரும்பப் பெற்றுக் கொள்ளலாம்.

(2) அங்காடியில் பொருள் வாங்கியதில் பிழை ஏற்பட்டால்:

அங்காடிகளில் வாடிக்கயாளர் கடன் அட்டை அல்லது பற்று அட்டையைக் கொடுத்துப் பொருள் வாங்குகிறார். அட்டை வழங்கிய நிறுவனம் மாதந்தோறும் அட்டைப் பரிமாற்ற விவரங்களைத் தொகுத்து வாடிக்கையாளருக்கு அனுப்பி வைக்கிறது. வாடிக்கையாளர் அவ்வறிக்கையில் ஏதேனும் பிழை இருப்பதைக் கண்டறிந்தால் உடன் புகார் அளிக்க வேண்டும். புகாரைக் கையாளும் வழிமுறை முன்கூறப்பட்டது போலவேதான். ஒரேயொரு வேறுபாடு என்னவெனில், புகாருக்கு உட்பட்ட தொகையை வாடிக்கையாளர் கணக்கில் வரவு வைத்தபின் புகாரை விசாரித்து உண்மையறிய 90 நாட்கள் எடுத்துக் கொள்ளலாம்.

(3) கடன் அட்டை, பற்று அட்டை தொலைந்து போனால் / களவு போனால்:

கடன் அட்டை தொலைந்து போனால் வாடிக்கையாளர் அடையும் இழப்பு 50 டாலருக்கு அதிகமாகாது. ஆனால் பற்று அட்டை தொலைந்து போனால், வாடிக்கையாளருக்கு ஏராளமான இழப்பு ஏற்பட வாய்ப்புண்டு. எனவே அட்டை தொலைந்து போனதை அல்லது இழப்பு ஏற்பட்டதை உடனே நிறுவனத்தின் கவனத்துக்குக் கொண்டுவர வேண்டும். 48 மணி நேரத்துக்குள் தெரிவித்தால் வாடிக்கையாளருக்கு ஏற்படும் இழப்பு 50 டாலர் மட்டுமே. அதன்பிறகு 60 நாட்களுக்குள் தெரிவித்தால் இழப்பு 500 டாலர் ஆகும். 60 நாட்களுக்குப் பிறகு தெரிவிக்கப்பட்டால் வாடிக்கையாளருக்கு ஏற்படும் இழப்புகளுக்கு நிறுவனம் பொறுப்பேற்காது. முழு இழப்பும் வாடிக்கையாளருக்கே. எனினும் மாநிலச் சட்டத்தில் அல்லது அட்டை நிறுவன ஒப்பந்தத்தில் அதிகக் காலக்கெடு கொடுக்கப்பட்டாலோ, குறைந்த இழப்புத் தொகை வரம்பு இருந்தாலோ அதுவே முன்னுரிமை பெறும். அமெரிக்கக் கூட்டமைப்புச் சட்டவிதி பொருந்தாது.

(4) பணப் பட்டுவாடாவை நிறுத்திவைத்தல்:

மின்னணுப் பணப் பரிமாற்றத்தில் வாடிக்கையாளரால் நடவடிக்கை தொடங்கப்பட்டபின் இடையில் பணப் பட்டுவாடாவை நிறுத்திவைக்க முடியாது. பிரச்சினையை வாடிக்கையாளரேதான் தீர்த்துக் கொள்ள வேண்டும். எனினும், வாடிக்கையாளர் வங்கிக் கணக்கிலிருந்து மூன்றாவது நபருக்குக் குறிப்பிட்ட காலக் கெடுவுகளில் பணம் செலுத்த முன்-அனுமதி வழங்கப்பட்ட பணப் பரிமாற்றங்களை வாடிக்கையாளரின் வாய்மொழி அல்லது எழுத்து மூலமான வேண்டுகோளின் பேரில் நிறுத்தி வைக்கலாம். வாய்மொழிக் கோரிக்கை எனில் 14 நாட்களுக்குள் எழுத்து மூலமான வேண்டுகோள் கடிதத்தை அனுப்பிவிட வேண்டும். எனினும் தனிப்பட்ட நிதி நிறுவனங்கள் பணப் பட்டுவாடா நிறுத்தம் தொடர்பாக வாடிக்கையாளர்களுக்குக் கூடுதல் உரிமைகள் வழங்கி ஒப்பந்தம் ஏற்படுத்திக் கொள்ளலாம்.

(5) முன் அனுமதிக்கப்பட்ட பணப் பரிமாற்றங்கள்:

வாடிக்கையாளர் வங்கிக் கணக்கில் வரவு வைக்கப்படும் (ஊதியம், வைப்புத் தொகைக்கான வட்டி போன்ற) மின்னணுப் பணப் பரிமாற்றம் பற்றிய தகவலை பணம் கொடுப்பவரிடமிருந்து வாடிக்கையாளர் நேரடியாகப் பெறலாம். அல்லது வாடிக்கையாளர் சார்பாக வங்கி பெற்றுக் கொள்ளலாம். முன் அனுமதி வழங்கப்பட்ட பணப் பரிமாற்றம் எதையும் வாய்மொழி அல்லது எழுத்து மூலமான வேண்டுகோளின் பேரில் நிறுத்தி வைக்கலாம். குறிப்பிட்ட காலக் கெடுவுகளில் வாடிக்கையாளர் கணக்கிலிருந்து வரி, கட்டணம், கடன் தவணை, பில்கள் போன்ற பணம் செலுத்தல்களில், தொகையில் ஏதேனும் மாற்றம் இருப்பின் அதுபற்றி முன்கூட்டியே அறிந்து கொள்ள வாடிக்கையாளருக்கு உரிமை உண்டு. ஆனால் வாடிக்கையாளர் கணக்கு வைத்துள்ள வங்கிக்குச் செலுத்த வேண்டிய பணத்துக்கு இவ்விதி பொருந்தாது. அதே வங்கியில் வாடிக்கையாளரின் ஒரு கணக்கிலிருந்து இன்னொரு கணக்குக்கு மாற்றப்படும் பணத்துக்கும் இவ்விதி பொருந்தாது.