வள்ளல் பாரி

பாடம்
Lesson

காட்சி - 4
இடம் - பறம்பு மலையின் ஒரு சாரல்.
இடம் பெறுவோர் - பாரி, கபிலர்
 
கபிலர் - வருக மன்னவா.! அதோ அந்த மலைச்சரிவின் பின்னால்தான் கலைவிழா.
பாரி - எங்கே...?
கபிலர் - முதலில் செவி மடுங்கள். குழல் இசைக்கிறதா?
பாரி - அட ஆமாம்.!
கபிலர் - அப்புறம்..... முழவு..?
பாரி - ஆமாம். நல்ல இசை.
கபிலர் - கூடவே, யாழிசை.
பாரி - ஆமாம்... ஆமாம்.!
கபிலர் - கொம்பொலி...?
பாரி - பொருத்தமாய் விட்டுவிட்டு ஒலிக்கிறதே. இந்த இனிய இசைக்கு நாட்டியமாடும் விறலி யாரோ?
கபிலர் - பார்க்கலாமா?
பாரி - பார்த்துக் களிக்கும் பார்வையாளர்கள்?
கபிலர் - நிறைய இருக்கிறார்கள். அவர்களைத் தொல்லைப்படுத்தாமல் நாம் பார்க்க வேண்டும்.
பாரி - ஆமாம். மன்னரும் புலவரும் வந்தார்கள் என்று அவர்கள் கலையை மறந்து நம்மைக் கவனித்துவிடக் கூடாது இல்லையா, கபிலரே.!
கபிலர் - ஆமாம்... மெல்ல.. மெல்ல இந்த மலைச்சரிவைத் தொடர்ந்து வாருங்கள். (மெல்ல முன்னேறுகிறார்கள்) (மெல்லத் திரும்பியபின்)
பாரி - என்ன... யாரும்...?
கபிலர் - உசு..... அமைதியாய் அங்கே பாருங்கள் விறலி ஆடுகிறாள். (கபிலர் சுட்டும் திசையில் கோல மயில் ஆடிக்கொண்டிருக்கின்றாள்.)
பாரி - ஆ.. ஆமாம்.!
கபிலர் - இதோ பார்வையாளர்கள் தங்களுக்கு வசதியான இருக்கைகளில்... (மரக்கிளைகளில் குரங்குகள் கூட்டமாய்க் குடும்பத்துடன்)
பாரி - ((வியப்பு குன்றாமல்) அட ஆமாம்..!
கபிலர் - குழல் இசைப்பது அதோ அந்த நெடியவன்தான்! (சுட்டும் திசையில் மூங்கில் மரங்கள். வண்டு துளைத்த அந்த மூங்கில் துளை வழியே புகுந்தக் காற்று புல்லாங்குழல் ஒலியாக மலை எங்கும் மெல்ல எதிரொலிக்க ஒலிக்கிறது)
கபிலர் - ஓ.....!
பாரி - அதோ அந்தப் பாறைகளின் மீது அலைக்-கைகள்கொண்டு முழவு இசைப்பது
கபிலர் - அருவி.
பாரி - கொம்பொலி தருவது.
கபிலர் - மான்களின் கூட்டம்.
பாரி - ஓ! மலர்களைச் சூழ்ந்த வண்டுகள் இசைப்பதுதான் யாழா? இனிமை கபிலரே இனிமை. இப்படி ஓர் இசையினை நுகர்வது என் பேறுதான்.. என்ன செய்ய வேண்டும் இந்தக் கலைஞர்களுக்கு? ஏதாவது கொடுத்தாக வேண்டுமே...!
கபிலர் - வள்ளலே உமது இயல்பு இந்தக் கலைஞர்களிடம் செல்லாது.
பாரி - எப்படி?
கபிலர் - இயற்கைக்குக் கொடுத்துதான் பழக்கம். உம்மைப்போலவே.
பாரி - இந்தக் கலைஞர்களைப் போற்றி நான் என்னப் பரிசில் கொடுப்பது?
கபிலர் - நீ மன்னனாய் இருந்து காத்தலே பரிசுதான். இயற்கையில் வளரும் உயிரினங்களுக்கு உனது காவல்தானே பரிசு மன்னவா!
பாரி - ஆனாலும்.....